2025 جىلعى نەگىزگى ۇلتتىق بىرىڭعاي تەستىلەۋدىڭ (ۇبت) العاشقى اپتاسى ەرەجەبۇزۋشىلىقتارمەن ەستە قالدى. عىلىم جانە جوعارى بىلىم مينيسترلىگى تاراتقان مالىمەتكە سۇيەنسەك, 29 تالاپكەر تەستىلەۋ كەزىندە تارتىپ بۇزعانى ۇشىن اۋديتورييادان شىعارىلىپ, 26 ۇمىتكەر تىيىم سالىنعان زاتتاردى (سمارتفون, شپارگالكا جانە ت.ب.) الىپ وتپەك بولعانى ۇشىن تەستتەن شەتتەتىلگەن, دەپ حابارلايدى Shalqar.kz.

16 مامىردان باستالعان ۇبت اياسىندا 52 مىڭنان استام تەستىلەۋ وتكىزىلگەن. ولاردىڭ 66%-ى قازاق تىلىندە, 33%-ى ورىس تىلىندە, ال 65 ادام اعىلشىن تىلىندە تاپسىرعان.

بىرىنشى اپتادا تەست تاپسىرۋشىلاردىڭ 62%-ى شەكتى بالل جيناعان. بەس پان بويىنشا ورتاشا ناتيجە – 61 بالل. ەڭ جوعارى ناتيجە – 140 بالل – تۇركىستان وبلىسىنىڭ تۇلەگى ابىلحان جانىبەككە تيەسىلى.

بيىلعى تەستىلەۋگە قاتىسۋعا 216 مىڭ تالاپكەردەن بارلىعى 399 مىڭعا جۋىق وتىنىش قابىلدانعان. ەڭ تانىمال پان كومبيناتسييالارى: “ماتەماتيكا-فيزيكا” – 20%, “شىعارماشىلىق ەمتيحان” – 17%, “بيولوگييا-حيمييا” – 11%.

ايتا كەتەيىك, ەرەكشە بىلىم بەرۋدى قاجەت ەتەتىن 163 تالاپكەرگە قولايلى جاعداي جاسالىپ, ولار دا تەستىلەۋگە قاتىسقان.

مينيسترلىك بيىل بەينەجازبالارعا تالداۋ 31 قازانعا دەيىن جۇرگىزىلەتىنىن ەسكە سالدى. ەگەر كەيىن ەرەجە بۇزۋشىلىقتار انىقتالسا, تەست ناتيجەسى جويىلادى.