ماجىلىس سپيكەرى ەرلان قوشانوۆتىڭ توراعالىعىمەن بيۋرو وتىرىسى وتىپ, الداعى جالپى وتىرىستىڭ كۇن تارتىبى ناقتىلاندى.

دەپۋتاتتاردىڭ تالقىلاۋىنا بىرىنشى وقىلىمدا قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن قاراۋ ەنگىزىلەدى. قۇجات ۇلتتىق زاڭنامانى حالىقارالىق ستاندارتتارعا, اتاپ ايتقاندا, اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبىنىڭ (FATF) ۇسىنىمدارىنا سايكەستەندىرۋ ماقساتىمەن ازىرلەنگەن.

زاڭ جوباسى اياسىندا قارجىلىق مونيتورينگ سۋبъەكتىلەرىنىڭ تىزىمىن كەڭەيتۋ ۇسىنىلادى. ولاردىڭ قاتارىنا ۇيالى بايلانىس وپەراتورلارىن جانە «ازاماتتارعا ارنالعان ۇكىمەت» مەملەكەتتىك كورپوراتسيياسىن قوسۋ كوزدەلىپ وتىر. سونداي-اق قارجىلىق مونيتورينگ سۋبъەكتىلەرىنىڭ ۋاكىلەتتى ورگانعا كۇماندى قىزمەت جونىندە حابارلاما جىبەرۋ مىندەتىن ەنگىزۋ ۇسىنىلادى. بۇدان بولەك, قولما-قول تۇردە مادەني قۇندىلىقتاردى ساتىپ الۋ نەمەسە ساتۋ, ولاردى اكەلۋ نەمەسە اكەتۋ, سونداي-اق تسيفرلىق اكتيۆتەرمەن جاسالاتىن وپەراتسييالار بويىنشا 5 ميلليون تەڭگەگە تەڭ نەمەسە ودان اساتىن سوماعا شەكتى مان بەلگىلەنەدى.

سونىمەن قاتار زاڭ جوباسىندا قارجىلىق وپەراتسييالاردىڭ اشىقتىعىن ارتتىرۋعا, قارجىلىق مونيتورينگ جۇيەسىن نىعايتۋعا جانە كىرىستەردى زاڭسىز جولمەن زاڭداستىرۋعا (اقشانى جىلىستاتۋعا) ارى تەرروريزمدى قارجىلاندىرۋعا قارسى كۇرەس شارالارىن كۇشەيتۋگە باعىتتالعان بىرقاتار باسقا نورما دا قاراستىرىلعان.

ەكىنشى وقىلىمدا دەپۋتاتتارعا قىلمىستىق, قىلمىستىق-پروتسەسسۋالدىق جانە قىلمىستىق-اتقارۋ كودەكستەرىن وڭتايلاندىرۋعا قاتىستى تۇزەتۋلەردى قاراۋ ۇسىنىلىپ وتىر. زاڭ جوباسىن پرەزيدەنتتىڭ 2022 جىلعى 1 قىركۇيەكتەگى «ادىلەتتى مەملەكەت. بىرتۇتاس ۇلت. بەرەكەلى قوعام» قازاقستان حالقىنا جولداۋى اياسىندا بەرىلگەن تاپسىرمالارىن ورىنداۋ ۇشىن ۇكىمەت ازىرلەگەن. بۇل تۇزەتۋلەر قۇقىق ۇستەمدىگىن قامتاماسىز ەتۋگە, مەملەكەتتىك ماجبۇرلەۋ شارالارىن ادىلەتتىلىك پەن جاۋاپكەرشىلىكتىڭ سايكەستىك قاعيداتتارىنا ساي كەلتىرۋگە, سونداي-اق قازاقستان رەسپۋبليكاسىنىڭ جوعارى كونستيتۋتسييالىق قۇندىلىقتارى مەن نەگىزگى قىزمەت قاعيداتتارىن تيىمدى قورعاۋعا باعىتتالعان.
سونىمەن قاتار دەپۋتاتتار «نىسانالى كاپيتال قورلارى (ەنداۋمەنت-قورلار) تۋرالى» جانە ىشكى ىستەر ورگاندارىنىڭ قىزمەتى سالاسىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرىنە قاتىستى زاڭنامالىق تۇزەتۋلەردى قارايدى.

جالپى وتىرىستا ماجىلىس بىرقاتار جاڭا حالىقارالىق قۇجاتتى جۇمىسقا الۋدى جوسپارلاپ وتىر. ولار: رەسەي فەدەراتسيياسىمەن قوستانايداعى چەليابى مەملەكەتتىك ۋنيۆەرسيتەتىنىڭ فيليالىنىڭ جۇمىس ىستەۋى تۋرالى كەلىسىم, تۇرىكمەنستانمەن قىلمىسپەن كۇرەستە ىنتىماقتاستىق جونىندەگى كەلىسىم, قاتار مەملەكەتىمەن قازاقستاندىق ازاماتتاردى جۇمىسقا ورنالاستىرۋدى رەتتەۋ تۋرالى كەلىسىم, سونداي-اق 2003 جىلعى 25 جەلتوقساندا جاسالعان قىرعىز رەسپۋبليكاسىمەن مەملەكەتتىك شەكاراداعى وتكىزۋ پۋنكتتەرى تۋرالى كەلىسىمگە وزگەرىستەر ەنگىزۋ تۋرالى حاتتاما.
سونىمەن قاتار كۇن تارتىبىنىڭ جوباسىندا سەنات ۇسىنعان «اكۆاشارۋاشىلىق تۋرالى» زاڭنىڭ جەكەلەگەن باپتارىندا جاڭا رەداكتسييادا ەنگىزىلگەن وزگەرىستەر دە  قارالادى.