ماجىلىس توراعاسى ەرلان قوشانوۆ استاناعا رەسمي ساپارمەن كەلگەن ارمەنييا رەسپۋبليكاسى ۇلتتىق جينالىسىنىڭ توراعاسى الەن سيمونيانمەن كەزدەستى.
مارتەبەلى مەيماندى قارسى العان ەرلان قوشانوۆ ارمەنييانىڭ وڭتۇستىك كاۆكاز ايماعىنداعى قازاقستان ۇشىن ماڭىزدى ارىپتەس ەكەنىن اتاپ وتتى. ماجىلىس سپيكەرى بىزدىڭ ەلىمىز ارمەنييا باسشىلىعى جۇزەگە اسىرىپ جاتقان اۋقىمدى ساياسي, ەكونوميكالىق جانە الەۋمەتتىك رەفورمالاردى ۇلكەن قىزىعۋشىلىقپەن باقىلاپ وتىرعانىن ايتتى.
– بىلتىر قازاقستان مەن ارمەنييا اراسىنداعى دوستىق جانە ىنتىماقتاستىق تۋرالى شارتتىڭ 25 جىلدىعىن اتاپ وتتىك. بۇل مەرەيتويعا وراي مەملەكەت باسشىلارىنىڭ رەسمي ساپارلار الماسۋىنىڭ سيمۆولدىق مانى زور. بۇل ەكى ماڭىزدى وقيعا جاڭا گەوساياسي جاعدايلارداعى مەملەكەتتەرىمىز اراسىنداعى ىنتىماقتاستىققا قۋاتتى قارقىن بەردى. وندا ارىپتەستىگىمىزدىڭ بارلىق سالالارىن قامتيتىن بىرقاتار كەلىسىمگە قول قويىلدى, – دەدى ەرلان قوشانوۆ.
كەزدەسۋ بارىسىندا پارلامەنت سپيكەرلەرى جوعارى دەڭگەيدە قول جەتكىزىلگەن كەلىسىمدەردى زاڭنامالىق تۇرعىدان راسىمدەۋ جانە جاڭا ەكونوميكالىق ارى مادەني جوبالاردى قولداۋ ماسەلەلەرىن تالقىلادى.
ماجىلىس توراعاسى ارميان ارىپتەسىن ەلىمىزدە جۇرگىزىلىپ جاتقان رەفورمالار مەن زاڭ شىعارۋ جۇمىسى جايىندا حاباردار ەتتى. اڭگىمە بارىسىندا تاراپتار قازاقستاندا قابىلدانعان الەۋمەتتىك ادىلدىك, زاڭ ۇستەمدىگى مەن تارتىپتى نىعايتۋعا باعىتتالعان زاڭداردىڭ ارمەنييا ۇشىن قىزىعۋشىلىق تۋدىراتىنىن اتاپ وتتى. وسى ورايدا دەپۋتاتتار بەيىندى كوميتەتتەر ارقىلى تاجىريبە الماسۋعا كەلىستى.
وز كەزەگىندە الەن سيمونيان پارلامەنتتەر اراسىنداعى قارىم-قاتىناستى جانداندىرۋ قاجەتتىگىنە نازار اۋداردى.
– پارلامەنتارالىق بايلانىستىڭ دامۋى وزارا تۇسىنىستىكتى تەرەڭدەتۋگە, سەنىمدى نىعايتۋعا, سونداي-اق ەكىجاقتى كەلىسىمدەردى تيىمدى جۇزەگە اسىرۋعا سەپتىگىن تيگىزەدى. بيىل ساۋىر ايىندا وتكەن قازاقستان مادەنيەتى كۇندەرى ارمەنييا ۇشىن مادەني-گۋمانيتارلىق سالاداعى ماڭىزدى وقيعاعا اينالدى. سونىمەن بىرگە ارمەنييا تاراپى قازاقستان بيلىگى مەن حالقىنىڭ ارميان دياسپوراسىنا دەگەن كوزقاراسىن جوعارى باعالايدى. ول – ەلدەرىمىز بەن حالىقتارىمىز اراسىنداعى ماڭىزدى دانەكەر, – دەدى ۇلتتىق جينالىس توراعاسى.
سونىمەن قاتار تاراپتار ەكونوميكا, لوگيستيكا, مادەني-گۋمانيتارلىق سالاداعى ىنتىماقتاستىقتىڭ كەڭ اۋقىمدى ماسەلەلەرىن دە تالقىلادى.
 
جازيرا امانتايقىزى