ماجىلىس سپيكەرى ەرلان قوشانوۆ  مەملەكەت باسشىسىنىڭ تاپسىرماسىمەن تۇركييا رەسپۋبليكاسىنىڭ ۇلتتىق كۇنىنە ارنالعان سالتاناتتى جيىنعا قاتىسىپ, باۋىرلاس تۇرىك حالقىن انادولى ەلىنىڭ قۇرىلعانىنا 101 جىل تولۋىمەن قۇتتىقتادى.
پالاتا توراعاسى وز سوزىندە قازاق حالقى تاۋەلسىزدىگىن ەڭ العاش تانىعان مەملەكەت رەتىندە تۇركييانى ەرەكشە قادىرلەيتىنىن اتاپ وتتى.
– بىلتىر عانا تامىرلاس ەلدىڭ عاسىر تويىن وزدەرىڭىزبەن بىرگە اتاپ وتكەن ەدىك. بيىل دا بۇل يگى داستۇر جالعاسىن تاۋىپ جاتىر, – دەدى ەرلان قوشانوۆ.
بيىل ەكى ەل اراسىندا دوستىق جانە ىنتىماقتاستىق تۋرالى كەلىسىمگە قول قويىلعانىنا 30 جىل تولىپ وتىر.
– بىزدىڭ دوستىعىمىزدىڭ تامىرى بۇدان دا تەرەڭدە جاتىر. سان عاسىرلىق ورتاق تاريحىمىز, مادەني-رۋحاني ساباقتاستىعىمىز سوعان كۋا. سول ەكىجاقتى قارىم-قاتىناس, بابالارىمىز سالىپ كەتكەن سارا جول جىل وتكەن سايىن جاندانىپ, ىنتىماعىمىز ورلەپ-وركەندەپ كەلەدى. قازىرگى تاڭدا قازاقستان مەن تۇركييا اراسىنداعى ىنتىماقتاستىق كەڭەيتىلگەن ستراتەگييالىق ارىپتەستىك دەڭگەيىنە جەتتى. وعان بىزدىڭ ەلدەرىمىزدىڭ كوشباسشىلارى قاسىم-جومارت توقاەۆ پەن رەجەپ تاييپ ەردوعاننىڭ اراسىنداعى مىزعىماس دوستىق بەرىك نەگىز بولۋدا. جانە قازاق-تۇرىك قارىم-قاتىناسىن جاڭا دەڭگەيگە كوتەرۋگە زور سەپتىگىن تيگىزۋدە, – دەدى پالاتا توراعاسى.
ماجىلىس سپيكەرى ستراتەگييالىق سەرىكتەستىكتىڭ ەرەكشە قارقىن الۋىندا قازاق-تۇرىك پارلامەنتارالىق ىنتىماقتاستىعىعىڭ ەڭبەگى مول ەكەنىنە نازار اۋداردى.  وعان بيىل مامىر ايىندا تۇركييا ۇلى ۇلتتىق ماجىلىسىنىڭ توراعاسى نۋمان كۋرتۋلمۋشتىڭ قازاقستانعا رەسمي ساپارى سەرپىن بەردى.
ەرلان قوشانوۆ ەكى ەلدىڭ زاڭ شىعارۋشى ورگاندارى مەملەكەت باسشىلارىنىڭ ۋاعدالاستىقتارىن قارقىندى ىسكە اسىرۋعا بەلسەنە اتسالىساتىنىن ايتتى.
سونىمەن قاتار, 2024 جىلى تۇركى مەملەكەتتەرى ۇيىمىنا 15 جىل تولادى. ماجىلىس توراعاسى وسى ايتۋلى داتامەن دە قۇتتىقتاپ, باۋىرلاس حالىقتارعا باق-بەرەكە تىلەدى.

 

جازيرا امانتايقىزى