Жиынды ашқан Бас Прокурордың орынбасары Әсет Шындалиев депутаттарға Бас прокуратураның заң шығару бастамаларын қолдағаны үшін алғысын білдірді. Ол Құқық қорғау органдары академиясы 2015 жылы құрылғанын, оның құқық қорғау қызметіне келетін тұлғаларды бастапқы кәсіби даярлаудан өткізіп, біліктілігін арттыру және жоғары оқу орнынан кейінгі білім беру қызметтерін ұсынатынын айтты.
Академия ректоры Марат Сексембаевтың айтуынша, 2021 жылдан бері оқу орнына 1,5 мыңнан астам студент түсіп, оның 1,2 мыңға жуығы оқуын аяқтаған. Білім беру мазмұны қадағалау практикасының материалдары, қылмыстық істер және іс жүргізу құжаттары, яғни нақты істер негізінде құрылады.
– Академия шетелдік және халықаралық ұйымдармен өзара ынтымақтастық туралы 39 меморандум жасасты. Оқу орны құқық қорғау саласындағы ведомствоаралық ғылыми зерттеулерді үйлестіреді және жүргізеді. 50-ге жуық ғылыми жоба аяқталды, оның нәтижелері тәжірибеге, норма шығару және оқу-тәрбие процесіне енгізіледі, – деді Марат Сексембаев.
Мәжілістің Заңнама және сот-құқықтық реформа комитетінің төрайымы Снежанна Имашева академияда өзекті мәселелерді шешуге қабілетті, құқық қорғау саласындағы жоғары білікті мамандарды даярлаудың маңыздылығына тоқталды. Ол академияның мемлекет пен қоғам мүддесіне қызмет етуге қабілетті кадрлар қалыптастыруда шешуші рөл атқаратынын айтты.
– Біздің Комитеттің депутаттары құқық қорғау жүйесінің тиімділігін арттыру, заң үстемдігі мен әділдікті қамтамасыз ету үшін қажетті заңнамалық базаны жетілдіру бойынша белсенді жұмыс жүргізуде. Біз академиямен ел мүддесіне сай келетін шешімдерді бірлесіп әзірлеу үшін өзара ынтымақтастыққа дайынбыз, – деді депутат.
Снежанна Имашева жақында мемлекеттік қызмет мәселелері бойынша заң жобасын қарау барысында құқық қорғау саласындағы заңнамаға көптеген өзгеріс енгізілгенін атап өтті. Олар персоналдың цифрлық рейтингі мен жоғары басшылық лауазымға көтерілу тәртібіне қатысты. Қазір Мәжілісте «Құқық қорғау қызметі туралы» заңға өзгерістер мен толықтырулар енгізу туралы заң жобасы қаралып жатыр. Ол қызметкерлерді ротациялау және соған байланысты өтемақы төлеу, тәртіптік жауапкершілікке тарту рәсімдерін жаңарту және басқа да маңызды мәселелерді шешуге бағытталған.
Отырыс барысында кадрларды дайындау мен біліктілігін арттыруға қатысты түйткілді мәселелер көтерілді. Атап айтқанда, магистратура мен докторантурада оқитын қызметкерлерді әлеуметтік қамсыздандыруды заңнамалық тұрғыдан бекіту қажеттігі туралы пікір айтылды.
Сондай-ақ көшпелі отырыс барысында депутаттар білім беру мекемесінің ғимаратын, оның ішінде сот залын, киберорталықты, прокурорлық полигонды, сондай-ақ психолог кабинеті мен студенттерге арналған жатақхананы аралады. Бұдан бөлек академия қызметкерлерінің ғылыми еңбектерінің жеке таныстырылымы өтті.

Жазира Амантайқызы