«Қазақстан Республикасы Конституциялық Сотының қорытынды шешімдерінің орындалуын заңнамалық реттеуді жетілдіру» атты дөңгелек үстелі Конституциялық Сот алаңында өтті.
Бірлескен іс-шараға Мәжіліс депутаттары, Конституциялық сот мүшелері, Сот әкімшілігінің, бас прокуратураның және Әділет министрлігінің өкілдері қатысты.
Іс-шараны ашқан Мәжілістің Заңнама және сот-құқықтық реформа комитетінің төрайымы Снежанна Имашева Конституциялық Соттың қорытынды шешімдерінің орындалуын заңнамалық реттеуді жетілдіру қолданыстағы олқылықтарды жоюға, нормативтік қаулылардың іске асырылуын жеделдетуге және мемлекеттік органдардың жауапкершілігін арттыруға мүмкіндік беретінін атап өтті.
– Шешімдерді орындаудың тиімділігін арттыру үшін бақылау мен жауапкершіліктің нақты рәсімдерін белгілеу, сондай-ақ заңнаманы Конституциялық соттың шешімдеріне жедел бейімдеу тетіктерін құру қажет. Бұл шаралар құқықтық тұрақтылықты арттыруға, конституциялық бақылау институтына деген сенімді нығайтуға мүмкіндік береді, – деді С.Имашева.
Конституциялық Соттың төрайымы Эльвира Асимова заң шығару процесі мен заңнамалық ұсыныстарды әзірлеу және қолданыстағы заңдар мен басқа да нормативтік құқықтық актілерді қолданудың тиімділігін бағалау үшін құқықтық қайнар көзі болып табылатын конституциялық бақылаудың нәтижелерін айтты. Оның айтуынша, 2024 жылы нормативтік-құқықтық актілерді Конституцияға сәйкестікке даулау бойынша 3747 өтініш түскен.
Депутат Үнзила Шапақ конституциялық бақылау органының 66 нормативтік қаулысының 17-сі заңдар мен Жоғарғы Соттың нормативтік қаулылары деңгейінде іске асырылғанын атап өтті. Мәжіліс үш заң жобасы шеңберінде Конституциялық Соттың 9 шешімі бойынша түзетулерді талқылауда. Жоғарғы Соттың заңдары мен нормативтік қаулылары деңгейінде іске асырылғанын атап өтті. Комитет қараған «Қазақстан Республикасының Әкімшілік құқық бұзушылық туралы Кодексіне өзгерістер мен толықтырулар енгізу туралы» заң шеңберінде бірқатар нормативтік қаулылар іске асырылды.
– Біздің міндетіміз – сапаны қамтамасыз ететін, азаматтардың құқықтарын сенімді қорғайтын, қоғамдық қатынастарды дұрыс реттейтін, халық үшін қолайлы жағдай жасайтын заңдар қабылдау, – деп қорытындылады Ү. Шапақ.
Іс-шара қорытындысы бойынша Конституциялық Соттың қорытынды шешімдерін іске асыруда одан әрі жетілдіру туралы ұсыныстар әзірленді.
 
Жазира Амантайқызы