29 مامىردا قىتايدىڭ سيانь قالاسىنان الماتىعا العاشقى تۋريستىك پويىز جولعا شىعادى. بۇل — قوس مەملەكەت اراسىنداعى تۋريزم مەن دوستىقتى نىعايتاتىن تاريحي قادام. ەكى ەلدىڭ مادەني بايلانىسى مەن ەكونوميكالىق قارىم-قاتىناسىنا سەرپىن بەرەتىن جوبا «ورتالىق ازييا – قىتاي» II سامميتى اياسىندا ىسكە اسىپ وتىر, دەپ حابارلايدى Shalqar.kz.

المالى قالاعا ساياحاتتايتىن پويىز 31 مامىردا الماتىعا جەتەدى. دەلەگاتسييا قۇرامىندا 250-دەن استام قوناق بار: مەملەكەتتىك ورگانداردىڭ وكىلدەرى, كاسىپكەرلەر, عالىمدار, مادەنيەت جانە سپورت قايراتكەرلەرى, مەديتسينا سالاسىنىڭ ماماندارى مەن تۋريستەر. دەلەگاتسييانى سيانь قالاسى اكىمىنىڭ ورىنباسارى سياو تسي باستاپ كەلەدى.

الماتىلىقتار ۇشىن دە, قوناقتار ۇشىن دە قىزىقتى كۇندەر باستالماق. تۋريستەر ۇشىن ارنايى مادەني جانە ىسكەرلىك باعدارلاما جاسالعان. قىتايلىق دەلەگاتسييا الماتىدا بەس كۇن بولادى, سودان كەيىن 5 ماۋسىم كۇنى كەرى قاراي, سيانьعا اتتانادى.

جوبانى جۇزەگە اسىرۋعا قازاقستان مەن قىتاي تاراپىنان بىرنەشە ىرى قۇرىلىم اتسالىسىپ وتىر. اتاپ ايتقاندا, قىتاي حالىق رەسپۋبليكاسىنىڭ مەملەكەتتىك دامۋ جانە رەفورمالار كوميتەتى, قر تۋريزم جانە سپورت مينيسترلىگى, «Kazakh Tourism» ۇلتتىق كومپانيياسى, «قازاقستان تەمىر جولى», سىرتقى ىستەر جانە كولىك مينيسترلىكتەرى, شەكارا قىزمەتى, ىىم, الماتى قالاسىنىڭ تۋريزم باسقارماسى جانە وتاندىق تۋروپەراتورلار بىرلەسىپ جۇمىس ىستەۋدە.