استانادا حالىقارالىق دەڭگەيدەگى جاڭا بىلىم بەرۋ جوباسى ىسكە قوسىلدى — قازاقستان مەن فرانتسييا اراسىنداعى سەرىكتەستىكتىڭ جەمىسى سانالاتىن حالىقارالىق فرانتسۋز مەكتەبىنىڭ قۇرىلىسى رەسمي تۇردە باستالدى. بولاشاق ليتسەيدىڭ تۇساۋكەسەر راسىمىندە مەكتەپ كىرەبەرىسىنە ەسكەرتكىش تاقتا ورناتىلدى, دەپ حابارلايدى Shalqar.kz.

مەكتەپ پانسيونى بار تولىققاندى بىلىم بەرۋ كەشەنى رەتىندە جۇمىس ىستەيتىن بولادى. وقۋ پروتسەسى فرانتسۋز جانە قازاقستاندىق بىلىم بەرۋ ستاندارتتارىنا نەگىزدەلىپ, قازاق, فرانتسۋز, اعىلشىن جانە ورىس تىلدەرىندە جۇرگىزىلەدى. بۇل جوبا قازاقستان پرەزيدەنتى قاسىم-جومارت توقاەۆ پەن فرانتسييا پرەزيدەنتى ەممانۋەلь ماكرون اراسىنداعى كەلىسىم اياسىندا جۇزەگە اسىپ وتىر.

سالتاناتتى شاراعا فرانتسييانىڭ سىرتقى ساۋدا جانە شەتەلدەگى فرانتسۋزدار جونىندەگى ۋاكىلەتتى مينيسترى لوران سەن-مارتەن ارنايى كەلىپ قاتىستى.

«استاناداعى بۇل مەكتەپ جانە جاقىن ارادا الماتىدا اشىلاتىن تاعى بىر فرانتسۋز مەكتەبى – جاس قازاقستاندىقتارعا كوپتىلدى, جان-جاقتى بىلىم الۋعا جول اشادى. بىزدىڭ حالىقارالىق بىلىم بەرۋ جەلىمىز – الەم بويىنشا جۇزدەگەن وقۋ ورنىن قامتيتىن كەڭ جۇيە. بۇل مەكتەپ – ديپلوماتييالىق قارىم-قاتىناستاردىڭ شىنايى كورىنىسى», – دەدى ول.

جوسپار بويىنشا, حالىقارالىق فرانتسۋز مەكتەبى العاشقى وقۋشىلارىن 2026 جىلدىڭ 1 قىركۇيەگىندە قابىلدايدى. مەكتەپ تەك بىلىم بەرۋ ساپاسىمەن ەمەس, ارحيتەكتۋراسىمەن دە ەرەكشە بولماق.

قازاقستان رەسپۋبليكاسىنىڭ وقۋ-اعارتۋ مينيسترى عاني بەيسەمباەۆتىڭ ايتۋىنشا, بۇل مەكتەپ – ەكى ەل اراسىنداعى سەنىم مەن دوستىقتى نىعايتاتىن ناقتى قادام.

«بۇل — جاي عانا قۇرىلىس ەمەس. بۇل — بولاشاققا سالىنعان كوپىر. فرانتسۋز مەكتەبى ەلدەرىمىز اراسىنداعى بىلىم سالاسىنداعى ىقپالداستىقتىڭ كورىنىسىنە اينالادى», – دەدى مينيستر.

استانادا قازاقستان-فرانتسييا بيزنەس-فورۋمى دا وتتى. بۇگىندە ەلىمىزدە فرانتسۋز كاپيتالى بار 170-كە جۋىق كومپانييا جۇمىس ىستەپ جاتىر.