ەGov Mobile قوسىمشاسىندا تاعى بىر ماڭىزدى قۇجات پايدا بولدى. ەندى ارەكەتكە قابىلەتسىز كامەلەتكە تولعان ازاماتتارعا قامقورشى نەمەسە قورعانشى رەتىندە تىركەلگەن ادامدارعا قاتىستى مالىمەتتەردى “تسيفرلىق قۇجاتتار” بولىمىنەن الۋعا بولادى, دەپ حابارلايدى Shalqar.kz.

بۇل قۇجات – قر ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي دەرەكتەرى نەگىزىندە اۆتوماتتى تۇردە جاسالادى. وندا قامقورشى مەن قامقورلىققا الىنۋشى تۋرالى مىناداي مالىمەتتەر كورسەتىلەدى:
 • جسن,
 • اتى-جونى (ت.ا.ا.),
 • تۋعان كۇنى,
 • جەرگىلىكتى اتقارۋشى ورگان بۇيرىعىنىڭ كۇنى مەن نومىرى,
 • قۇجاتتىڭ جارامدىلىق مەرزىمى.

تسيفرلىق قۇجاتتى مەملەكەتتىك قىزمەتتەر الۋ كەزىندە نەمەسە باسقا ۇيىمدارعا ۇسىنۋعا بولادى. بۇل – قاعازباستىلىقتان ارىلۋعا, ۋاقىتىڭدى ۇنەمدەۋگە جانە قاجەتتى قۇجاتتى ۇنەمى جانىڭدا ۇستاۋعا مۇمكىندىك بەرەتىن تاعى بىر قادام.