2025 جىلدىڭ 1 ماۋسىمىنان باستاپ قازاقستاندا بالالاردىڭ سپورت, ونەر جانە قوسىمشا بىلىم بەرۋ ۇيىرمەلەرىنە قاتىسۋىنا ارنالعان بىرىڭعاي ۆاۋچەر جۇيەسى پيلوتتىق رەجيمدە ىسكە قوسىلادى. بۇل باستاما – بالالارعا جايلى ورتا قالىپتاستىرىپ, جەمقورلىق پەن الاياقتىقتىڭ الدىن الۋعا باعىتتالعان جاڭا قادام, دەپ حابارلايدى Shalqar.kz مادەنيەت جانە اقپارات مينيسترلىگىنىڭ باسپاسوز قىزمەتىنە سىلتەمە جاساپ.

ەندى ۆاۋچەر ۇيىمعا ەمەس, تىكەلەي بالاعا بەرىلەدى. بۇل نە بەرەدى? بالانىڭ قالاۋى وزگەرسە, ول بىر ۇيىرمەدەن ەكىنشىسىنە ەركىن وتە الادى. ەشقانداي قايتا كەزەككە تۇرۋ نەمەسە قارجىلاندىرۋدان ايىرىلىپ قالۋ قاۋپى جوق.

نەلىكتەن بۇل جۇيە قاجەت بولدى?

جۇرگىزىلگەن تەكسەرىستەر جۇيەدەگى كوپتەگەن زاڭبۇزۋشىلىقتى اشكەرەلەدى:
 • كەي بالالار جالعان تىركەلىپ, “قاتىسۋشى” دەپ كورسەتىلگەن;
 • 160-تان استام سەكتسييا پاتەر, جەرتولە سەكىلدى سانيتارلىق تالاپقا ساي ەمەس جەرلەردە جۇمىس ىستەگەن;
 • 6 وڭىردە ىستى بولعان ازاماتتار بالالارعا ساباق بەرگەن;
 • 8 مىڭنان اسا بالا جۇيەدە تىركەلگەنىمەن, ناقتى ساباققا قاتىسپاعان.

بۇل جاعدايلار مەملەكەت قارجىسىن تيىمسىز پايدالانۋ مەن بالالاردىڭ قاۋىپسىزدىگىنە قاتەر توندىرۋ فاكتىلەرىن ايقىن كورسەتىپ وتىر.

جاڭا جۇيە قالاي جۇمىس ىستەيدى?

ۆاۋچەرلەر ەكى تۇرلى بولادى:
 1. نىسانالى ۆاۋچەر – مەملەكەتتىك مەكەمەلەر ۇشىن, كەزەكسىز بەرىلەدى.
 2. امبەباپ ۆاۋچەر – اتا-انا eGov.kz ارقىلى قالاعان جەكەمەنشىك ۇيىمدى تاڭداي الادى. مۇندا كەزەك بالانىڭ جاسى مەن الەۋمەتتىك مارتەبەسىنە قاراي بەلگىلەنەدى.

بۇكىل جۇيە تسيفرلاندىرىلعان: بالا ساباققا كەلگەن سايىن بۇل جۇيەدە تىركەلەدى, ال اتا-انالار مەن مەملەكەت قاراجاتتىڭ قالاي جانە قايدا جۇمسالىپ جاتقانىن ناقتى كورە الادى.

قانداي ۇيىرمەلەر قامتىلادى?
 • سپورتتىق سەكتسييالار (تۋريزم جانە سپورت مينيسترلىگى ۇيلەستىرەدى)
 • شىعارماشىلىق ۇيىرمەلەر (مادەنيەت جانە اقپارات مينيسترلىگى)
 • قوسىمشا بىلىم بەرۋ (وقۋ-اعارتۋ مينيسترلىگى)

تسيفرلىق ينفراقۇرىلىم مەن تەحنيكالىق سۇيەمەلدەۋدى تسيفرلىق دامۋ مينيسترلىگى قامتاماسىز ەتەدى.

بۇل پيلوتتىق جوبا الدىمەن استانا, شىمكەنت, قاراعاندى, قىزىلوردا, اتىراۋ جانە اقتوبە قالالارىندا جۇزەگە اسادى. ەگەر جۇيە تيىمدىلىگىن كورسەتسە – بۇكىل ەل بويىنشا قولدانىسقا ەنگىزىلۋى مۇمكىن.

بۇرىن اتا-انا ۇيىرمەنى تاڭداسا, قازىر تاڭداۋ قۇقىعى – بالادا. قاي باعىتقا قىزىعاتىنىن وزى شەشەدى. بۇل – ونىڭ ەركىندىگىن قۇرمەتتەۋ جانە دامۋىنا قولايلى ورتا ۇسىنۋ جولى.