2025 jıldıñ 1 mausımınan bastap Qazaqstanda balalardıñ sport, öner jäne qosımşa bilim beru üyirmelerine qatısuına arnalğan birıñğay vauçer jüyesi pilottıq rejimde iske qosıladı. Bwl bastama – balalarğa jaylı orta qalıptastırıp, jemqorlıq pen alayaqtıqtıñ aldın aluğa bağıttalğan jaña qadam, dep habarlaydı Shalqar.kz Mädeniet jäne aqparat ministrliginiñ baspasöz qızmetine silteme jasap.

Endi vauçer wyımğa emes, tikeley balağa beriledi. Bwl ne beredi? Balanıñ qalauı özgerse, ol bir üyirmeden ekinşisine erkin öte aladı. Eşqanday qayta kezekke twru nemese qarjılandırudan ayırılıp qalu qaupi joq.

Nelikten bwl jüye qajet boldı?

Jürgizilgen tekserister jüyedegi köptegen zañbwzuşılıqtı äşkereledi:
 • Key balalar jalğan tirkelip, “qatısuşı” dep körsetilgen;
 • 160-tan astam sekciya päter, jertöle sekildi sanitarlıq talapqa say emes jerlerde jwmıs istegen;
 • 6 öñirde isti bolğan azamattar balalarğa sabaq bergen;
 • 8 mıñnan asa bala jüyede tirkelgenimen, naqtı sabaqqa qatıspağan.

Bwl jağdaylar memleket qarjısın tiimsiz paydalanu men balalardıñ qauipsizdigine qater töndiru faktilerin ayqın körsetip otır.

Jaña jüye qalay jwmıs isteydi?

Vauçerler eki türli boladı:
 1. Nısanalı vauçer – memlekettik mekemeler üşin, kezeksiz beriledi.
 2. Ämbebap vauçer – ata-ana eGov.kz arqılı qalağan jekemenşik wyımdı tañday aladı. Mwnda kezek balanıñ jası men äleumettik märtebesine qaray belgilenedi.

Bükil jüye cifrlandırılğan: bala sabaqqa kelgen sayın bwl jüyede tirkeledi, al ata-analar men memleket qarajattıñ qalay jäne qayda jwmsalıp jatqanın naqtı köre aladı.

Qanday üyirmeler qamtıladı?
 • Sporttıq sekciyalar (Turizm jäne sport ministrligi üylestiredi)
 • Şığarmaşılıq üyirmeler (Mädeniet jäne aqparat ministrligi)
 • Qosımşa bilim beru (Oqu-ağartu ministrligi)

Cifrlıq infraqwrılım men tehnikalıq süyemeldeudi Cifrlıq damu ministrligi qamtamasız etedi.

Bwl pilottıq joba aldımen Astana, Şımkent, Qarağandı, Qızılorda, Atırau jäne Aqtöbe qalalarında jüzege asadı. Eger jüye tiimdiligin körsetse – bükil el boyınşa qoldanısqa engizilui mümkin.

Bwrın ata-ana üyirmeni tañdasa, qazir tañdau qwqığı – balada. Qay bağıtqa qızığatının özi şeşedi. Bwl – onıñ erkindigin qwrmetteu jäne damuına qolaylı orta wsınu jolı.