Жоғары білім туралы жалған құжаттар жасағандар енді жазадан жалтара алмайды, деп
 хабарлайды Shalqar.kz ҚР Ғылым және жоғары білім министрлігінің баспасөз қызметіне сілтеме жасап.

Министрлік өкілдері интернетте жалған дипломдар туралы жарнамалардың көбейгенін айтып, азаматтарды ескертті: диплом қолдан жасау – заң алдында жауапкершілікке әкеледі.

Жалған құжаттардың алдын алу үшін 1991 жылдан бері берілген дипломдардың бірыңғай электрондық базасы жасалған. Ал 2021 жылдан бастап еліміздегі барлық жоғары оқу орындары жеке үлгідегі дипломдар бере бастады. Бұл құжаттардың түпнұсқалығын Жоғары білім берудің бірыңғай платформасы арқылы тексеруге болады.

«Қазірдің өзінде базаға 3 миллионнан астам дерек енгізілді. Бұл – күмәнді құжаттарды бірден анықтауға мүмкіндік береді», – делінген министрлік хабарламасында.

Министрлік ескерткендей, жалған дипломды қолдан жасау немесе пайдалану – қылмыстық жауапкершілікке әкелетін әрекет. Яғни мұндай қадамға барғандар заңмен жазаланады.