جوعارى بىلىم تۋرالى جالعان قۇجاتتار جاساعاندار ەندى جازادان جالتارا المايدى, دەپ
 حابارلايدى Shalqar.kz قر عىلىم جانە جوعارى بىلىم مينيسترلىگىنىڭ باسپاسوز قىزمەتىنە سىلتەمە جاساپ.

مينيسترلىك وكىلدەرى ينتەرنەتتە جالعان ديپلومدار تۋرالى جارنامالاردىڭ كوبەيگەنىن ايتىپ, ازاماتتاردى ەسكەرتتى: ديپلوم قولدان جاساۋ – زاڭ الدىندا جاۋاپكەرشىلىككە اكەلەدى.

جالعان قۇجاتتاردىڭ الدىن الۋ ۇشىن 1991 جىلدان بەرى بەرىلگەن ديپلومداردىڭ بىرىڭعاي ەلەكتروندىق بازاسى جاسالعان. ال 2021 جىلدان باستاپ ەلىمىزدەگى بارلىق جوعارى وقۋ ورىندارى جەكە ۇلگىدەگى ديپلومدار بەرە باستادى. بۇل قۇجاتتاردىڭ تۇپنۇسقالىعىن جوعارى بىلىم بەرۋدىڭ بىرىڭعاي پلاتفورماسى ارقىلى تەكسەرۋگە بولادى.

«قازىردىڭ وزىندە بازاعا 3 ميلليوننان استام دەرەك ەنگىزىلدى. بۇل – كۇماندى قۇجاتتاردى بىردەن انىقتاۋعا مۇمكىندىك بەرەدى», – دەلىنگەن مينيسترلىك حابارلاماسىندا.

مينيسترلىك ەسكەرتكەندەي, جالعان ديپلومدى قولدان جاساۋ نەمەسە پايدالانۋ – قىلمىستىق جاۋاپكەرشىلىككە اكەلەتىن ارەكەت. ياعني مۇنداي قادامعا بارعاندار زاڭمەن جازالانادى.