بۇگىن, 1 ماۋسىم – حالىقارالىق بالالاردى قورعاۋ كۇنى. بۇل كۇن الەمنىڭ كوپتەگەن ەلدەرىندە بالالاردىڭ قۇقىعىن قورعاۋعا, ولاردىڭ دەنساۋلىعى مەن قاۋىپسىزدىگىنە نازار اۋدارۋعا باعىتتالعان. قازاقستاندا دا بۇل كۇن ەرەكشە مانگە يە – ەلىمىزدىڭ تۇكپىر-تۇكپىرىندە تۇرلى مەرەكەلىك شارالار, كونتسەرتتەر مەن قايىرىمدىلىق اكتسييالار ۇيىمداستىرىلىپ جاتىر.

الماتى, استانا, شىمكەنت قالالارىندا اشىق الاڭداردا بالالارعا ارنالعان ويىن-ساۋىق باعدارلامالارى وتتى. اسىرەسە, مۇمكىندىگى شەكتەۋلى بالالارعا ارنالعان ارنايى فەستيۆالьدەر كوپشىلىكتىڭ كوڭىلىنەن شىقتى. سونىمەن قاتار, جەرگىلىكتى اكىمدىكتەر از قامتىلعان جانە كوپبالالى وتباسىلاردىڭ بۇلدىرشىندەرىنە سىيلىقتار تابىس ەتىپ, قۋانىش سىيلادى.

بىلىم جانە عىلىم مينيسترلىگىنىڭ مالىمەتىنشە, بيىلعى جىلى ەل بويىنشا 500 مىڭنان استام بالا مەكتەپكە دەيىنگى بىلىممەن قامتىلعان. مينيسترلىك بالالاردىڭ قاۋىپسىزدىگى مەن جان-جاقتى دامۋى ۇشىن قوسىمشا باعدارلامالار ازىرلەنىپ جاتقانىن حابارلادى.

«بالالار – بىزدىڭ بولاشاعىمىز. ولاردىڭ كۇلكىسى مەن اماندىعى – ەل دامۋىنداعى ەڭ ماڭىزدى كورسەتكىشتەردىڭ بىرى», – دەيدى بالالار قۇقىقتارى جونىندەگى ۋاكىل دينارا زاكيروۆا.

ايتا كەتەيىك, حالىقارالىق بالالار كۇنى 1950 جىلدان بەرى اتالىپ وتەدى. بۇل – تەك ويىن مەن مەرەكە ەمەس, بالانىڭ قۇقىعى, بوستاندىعى, جانە قاۋىپسىز بالالىق شاعى ۇشىن كۇرەستىڭ سيمۆولى.

Shalqar.kz ۇجىمى ەلىمىزدىڭ بارلىق بالالارىنا شاتتىققا تولى بالالىق شاق, دەنساۋلىق پەن بەيبىت اسپان تىلەيدى.
بالا كۇلكىسى – الەمنىڭ ەڭ جارىق ۇنى!