مەملەكەت حالىقتىڭ الەۋمەتتىك وسال توپتارىنا كورسەتەتىن كومەكتى كۇشەيتتى. جىل باسىنان بەرى مۇگەدەكتىگى بار جانە اسىراۋشىسىنان ايىرىلعان ازاماتتارعا 247 ملرد تەڭگەدەن استام قاراجات بولىندى. ونىڭ ىشىندە 217,4 ملرد تەڭگە — رەسپۋبليكالىق بيۋدجەتتەن, ال 29,6 ملرد تەڭگە — مەملەكەتتىك الەۋمەتتىك ساقتاندىرۋ قورىنان (ماسق) تولەنگەن, دەپ حابارلايدى Shalqar.kz.

ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنشە, 2025 جىلدىڭ 1 مامىرىنداعى جاعداي بويىنشا جاردەماقى الاتىنداردىڭ جالپى سانى 540,4 مىڭ ادامدى قۇراسا, ونىڭ 196,7 مىڭى — اسىراۋشىسىنان ايىرىلعاندار.

مۇگەدەكتىك بويىنشا جاردەماقى مولشەرى ار ادامنىڭ جاعدايىنا — مۇگەدەكتىك توبىنا, اۋرۋ تۇرىنە بايلانىستى بەلگىلەنەدى. ال اسىراۋشىسىنان ايىرىلعاندارعا تولەنەتىن سوما ولاردىڭ سانىنا جانە قايتىس بولعان ادامنىڭ تابىسىنا قاراي ەسەپتەلەدى.

بيىل ەڭبەككە قابىلەتتىلىگىنەن ايىرىلعان 91,7 مىڭ ازاماتقا جانە 63,5 مىڭنان استام وتباسىعا الەۋمەتتىك تولەم جاسالدى. بۇل تولەمدەر ماسق ارقىلى اۋدارىلىپ, رەسپۋبليكالىق بيۋدجەتتەن تولەنەتىن نەگىزگى جاردەماقىلاردى تولىقتىرادى.

2025 جىلدىڭ 1 قاڭتارىنان باستاپ ەڭ تومەن كۇنكورىس دەڭگەيىنىڭ وسۋىنە بايلانىستى جاردەماقىلار 6,5%-عا ارتتى. ۇكىمەتتىڭ شەشىمىمەن ماسق-دان بەرىلەتىن تولەمدەر دە دال وسىنداي پايىزعا كوبەيتىلدى.

مىسالى:
 • مۇگەدەكتىگىنە بايلانىستى ماج (مەملەكەتتىك الەۋمەتتىك جاردەماقى) مولشەرى:
 • 1-توپ — 101 702 تەڭگە,
 • 2-توپ — 81 362 تەڭگە,
 • 3-توپ — 55 474 تەڭگە.
 • ەڭبەككە قابىلەتتىلىگىنەن ايىرىلعاندارعا تولەنەتىن الەۋمەتتىك تولەم — ورتا ەسەپپەن 70 124 تەڭگە.
 • اسىراۋشىسىنان ايىرىلعاندارعا — 72 524 تەڭگە كولەمىندە.

بۇل وزگەرىستەر الەۋمەتتىك قولداۋدىڭ كۇشەيگەنىن جانە مەملەكەت تاراپىنان ازاماتتاردىڭ ومىر ساپاسىن جاقسارتۋعا باعىتتالعان ناقتى قادامدار جاسالىپ جاتقانىن كورسەتەدى.