2025–2026 وقۋ جىلىنا مەملەكەتتىك بىلىم بەرۋ گرانتتارىنىڭ سانى بەلگىلى بولدى. بۇل جاڭالىق بولاشاق ستۋدەنتتەر مەن اتا-انالار ۇشىن زور ۇمىت سىيلاپ وتىر, دەپ حابارلايدى Shalqar.kz.

عىلىم جانە جوعارى بىلىم مينيسترلىگىنىڭ مالىمەتىنشە, بيىل 70 مىڭعا جۋىق تالاپكەر جوعارى وقۋ ورنىنا تەگىن تۇسە الادى. گرانتتاردىڭ باسىم بولىگى – سۇرانىسقا يە ماماندىقتارعا بولىنگەن.

  پەداگوگيكالىق باعىت – 13 226 گرانت
  ينجەنەرلىك, وڭدەۋ جانە قۇرىلىس سالالارى – 19 000-عا جۋىق گرانت
  اقپاراتتىق-كوممۋنيكاتسييالىق تەحنولوگييالار – 11 000-نان استام
  جاراتىلىستانۋ عىلىمدارى, ماتەماتيكا جانە ستاتيستيكا – 9 000+
  ونەر مەن گۋمانيتارلىق عىلىمدار – 1 915 گرانت

مينيسترلىك دەرەگىنشە, 2019 جىلى تۋعان 400 مىڭنان استام بالا بيىل العاش رەت مەكتەپ تابالدىرىعىن اتتايدى. ال 2027 جىلعا قاراي ەلىمىزدەگى وقۋشى سانى 5 ميلليونعا جۋىقتايدى. بۇل — بولاشاقتا مۇعالىمدەرگە دەگەن سۇرانىستىڭ ارتا تۇسەتىنىن بىلدىرەدى.

سول سەبەپتى پەداگوگيكا سالاسىنا ەرەكشە كوڭىل بولىنىپ وتىر. جاس تۇلەكتەر ۇشىن بۇل سالا – ارى تۇراقتى, ارى بولاشاعى بار باعىتتاردىڭ بىرى.