Қазақстанда интернет пен ұялы байланыс үшін жаңа қаржылық жүктеме пайда болуы мүмкін. Цифрлық даму, инновациялар және аэроғарыш өнеркәсібі министрлігі байланыс сапасын арттырып, азаматтардың құқықтарын қорғау мақсатында арнайы қор құруды ұсынып отыр, деп хабарлайды Shalqar.kz.

Жарияланған заң жобасына сәйкес, бұл қор коммерциялық емес ұйым ретінде құрылмақ. Оның басты міндеттері:
 • Байланыс инфрақұрылымын жақсарту
 • Қол жетімсіз не әлсіз байланыс бар аймақтарға инвестиция тарту
 • Пайдаланушылардың құқықтарын қорғауға бағытталған жобаларды қаржыландыру

Қор мына көздерден қаржыландырылмақ:
 • Байланыс операторлары мен интернет-провайдерлердің міндетті жарналары
 • Ерікті аударымдар мен қайырымдылық көмектер
 • Заңмен рұқсат етілген басқа да көздер

Негізгі мәселе – міндетті жарна көлемі. Құжатқа сәйкес, операторлар өздерінің жылдық табысының 3 пайызын осы қорға аударып отырады. Бұл байланыс қызметтерін тікелей қымбаттатуды көздемейді, дегенмен сарапшылардың пікірінше, операторлар бұл шығынды тарифтерді көтеру арқылы өтеуі мүмкін.

Заң жобасында тариф бағаларын шектеу немесе өсімге тыйым салу жайлы нақты ереже қарастырылмаған.

Жобаға қатысты қоғамдық талқылау 2025 жылдың 10 маусымына дейін жалғасады. Азаматтар, сарапшылар мен саланың мүдделі тараптары өз пікірін онлайн түрде қалдыра алады.


 • Жаңа қор байланыс сапасын арттыруға бағытталғанымен, ол байланыс құнын жанама түрде көтеруі мүмкін.
 • Мұндай жүйе әлемдік тәжірибеде де кездеседі, алайда ол реттелмесе, тұтынушының қалтасына салмақ салуы ықтимал.