بۇگىن, 2025 جىلدىڭ 6 ماۋسىمى – قۇربان ايتتىڭ العاشقى كۇنى. بۇل – بۇكىل الەمدەگى مۇسىلماندار ۇشىن ەرەكشە مەيرام. يسلام كۇنتىزبەسى بويىنشا زۇل-حيججا ايىنىڭ 10-ى كۇنى باستالاتىن بۇل ايت مەيرامى ۇش كۇنگە سوزىلادى. قازاقستاندا قۇربان ايتتىڭ بىرىنشى كۇنى رەسمي مەرەكە رەتىندە اتاپ وتىلەدى.

قۇربان ايت – بىرلىك پەن بەرەكە, يماندىلىق پەن ىزگىلىككە ۇندەيتىن مەيرام. بۇل كۇندەرى مۇسىلماندار مەشىتكە بارىپ, ايت نامازىن وقيدى, قۇرباندىق شالادى جانە جاقىن-جۋىقتارىنا, مۇقتاج جاندارعا كومەك كورسەتەدى. ايت كەزىندە تەك ەت تاراتىلىپ قويمايدى, بۇل – ادامدار اراسىنداعى قامقورلىق پەن جاناشىرلىقتىڭ كورىنىسى.

قۇربان ايتتا جاعدايى جەتكەن مۇسىلمان قۇرباندىق شالۋ ارقىلى اللانىڭ رازىلىعىنا بولەنۋگە ۇمتىلادى. قۇرباندىق ەتى ۇشكە بولىنىپ: بىر بولىگى – وتباسىنا, ەكىنشى بولىگى – تۋىستار مەن كورشىلەرگە, ال ۇشىنشى بولىگى – مۇقتاج جاندارعا بەرىلەدى.

قۇربان ايتتىڭ مانى نەدە?

قۇربان ايت – تەك قۇربان شالۋ عانا ەمەس, ول – جۇرەكتەگى سەنىمنىڭ, شۇكىرشىلىكتىڭ, ادامگەرشىلىكتىڭ, سابىر مەن مەيىرىمنىڭ بەلگىسى. بۇل مەيرام يبراھيم (ع.س.) پايعامباردىڭ اللا جولىنداعى سىناققا سابىرمەن بويسۇنىپ, ۇلى يسمايىلدى قۇربان ەتۋگە دايىن بولعاندىعىنىڭ ەستەلىگى. سول وقيعا – ادامزاتقا سەنىم مەن مويىنسۇنۋدىڭ ەڭ جوعارعى ۇلگىسى رەتىندە قالعان.

قۇربان ايت كۇندەرى:
 • رەنجىسكەندەر تاتۋلاسادى,
 • قارتتار مەن اتا-انالارعا ەرەكشە كوڭىل بولىنەدى,
 • جەتىمدەر مەن مۇقتاجدارعا كومەك كورسەتىلەدى,
 • ۇيلەرگە قۋانىش پەن مەيىرىم ەنەدى.