Қазақстандағы 3000-нан астам ауыл жоғары жылдамдықты интернетке қосылады. Бұл – Цифрлық даму, инновациялар және аэроғарыш өнеркәсібі министрлігі мен “Қазақтелеком” АҚ арасындағы жаңа инвестициялық келісімнің нәтижесі, деп хабарлайды Shalqar.kz.

Жобаның басты мақсаты — ауыл мен қаланың цифрлық теңдігін қамтамасыз ету.

– Талшықты-оптикалық желілер құрылысы 2026 жылдың соңына дейін аяқталады (бастапқы жоспардан бір жыл бұрын).
– Шалғай аймақтар 2027 жылдың соңына дейін жерсеріктік интернетпен қамтылады.
– Нәтижесінде, ауылдардың 99%-ы интернетпен қамтамасыз етіледі.

Желіге ең алдымен мына нысандар қосылады:
– мектептер
– ауруханалар
– әкімдіктер
– шекара бекеттері
– бюджеттік ұйымдар мен қоғамдық Wi-Fi нүктелері

Жалпы алғанда, ауылдардың 88%-ы – талшықты-оптикалық, ал 12%-ы – спутниктік арналармен қосылады.

Жобаға 239 миллиард теңгеден астам инвестиция тартылған. Ең бастысы – бұл бюджеттен тыс қаражат, “Қазақтелекомның” инфрақұрылымдық мүмкіндіктері арқылы жүзеге асады.

Ауылдарда ұялы байланыстың базалық станциялары да жаңартылып, сапасы артады. Бұл – мобильді интернеттің жылдамдығын көтеріп, байланыс сапасын жаңа деңгейге шығарады.

Жаслан Мәдиев, министр:
«Біздің мақсат — тек интернет жеткізу емес, ауылды елдің цифрлық экожүйесіне толық енгізу. Бұл білім, денсаулық, мемлекеттік қызметтерге тең қолжетімділікті қамтамасыз етеді».

Бағдат Мусин, “Қазақтелеком” басшысы:
«Ауыл баласы мен қала баласының мүмкіндігі бірдей болуы керек. Цифрлық теңсіздік жойылуы тиіс. Интернет — сән емес, ол — базалық қажеттілік».