اسكەري ومىر ەندى اشىق ارى ادىل بولماق. قازاقستان قارۋلى كۇشتەرىندە اسكەري قىزمەتشىلەردىڭ قاۋىپسىزدىگىن كۇشەيتۋ ۇشىن جاڭا قادامدار جاسالۋدا. مەملەكەت باسشىسى قاسىم-جومارت توقاەۆتىڭ تاپسىرماسىمەن ەلدەگى اسكەري بولىمدەردە زاماناۋي بەينەباقىلاۋ جۇيەلەرى ورناتىلادى. بۇل باستاما ساربازداردىڭ ومىرىن قورعاۋعا جانە اسكەري ورتاداعى ادىلەت پەن تارتىپتى قامتاماسىز ەتۋگە باعىتتالعان, دەپ حابارلايدى Shalqar.kz.

باس اسكەري پروكۋراتۋرا قولعا العان ەكى ىرى جوبا — «اسكەردەگى زاڭ جانە تارتىپ» پەن «تسيفرلىق پروفيلاكتيكا» — اسكەري قىزمەتتىڭ جاڭا تسيفرلىق داۋىرىنە جول اشپاق. ەندى بولىمشەلەرگە جاساندى ينتەللەكت نەگىزىندە جۇمىس ىستەيتىن بەينەباقىلاۋ جۇيەلەرى ورناتىلادى. ولار جاعدايدى اۆتوماتتى تۇردە تالداپ, قاۋىپتىڭ الدىن الۋعا كومەكتەسەدى.

اسىرەسە, دالالىق جاتتىعۋلار, اتىس جانە جاۋىنگەرلىك كەزەكشىلىك كەزىندە ساربازدار بەينەجەتونمەن جابدىقتالادى. بۇل جۇيە كومانديرلەر مەن جاۋىنگەرلەردىڭ ارەكەتىن ناقتى باقىلاۋعا مۇمكىندىك بەرىپ, سەنىم مەن ادىلدىكتى ارتتىرادى.

تسيفرلاندىرۋ تولقىنى شاقىرۋ پروتسەسىن دە قامتىپ وتىر. ەندى اسكەري كوميسسييا جۇمىسى تولىق اۋديو-بەينە جازباعا تۇسىپ, حاتتامالار ونلاين قولجەتىمدى بولادى. بۇل مەديتسينالىق قارسى كورسەتىلىمدەرى بار ازاماتتاردىڭ اسكەر قاتارىنا زاڭسىز شاقىرىلۋىنىڭ الدىن الادى.

بۇگىندە armia.kz سايتىندا تسيفرلىق كەڭەسشى ىسكە قوسىلىپ, ساربازدارعا ارنالعان بايلانىس ارنالارى جەتىلدىرىلۋدە. ەندى اربىر اسكەري قىزمەتشى قايدا جۇگىنۋ كەرەك ەكەنىن ناقتى بىلەدى جانە شاعىمى ەسكەرۋسىز قالمايتىنىنا سەنىمدى بولادى.