قازاقستاندا كونستيتۋتسييانىڭ 30 جىلدىعىنا وراي راقىمشىلىق جاسالۋى مۇمكىن. بۇل تۋرالى ماجىلىستە ارنايى زاڭ جوباسى ۇسىنىلىپ, دەپۋتاتتار تاراپىنان قولداۋ تاپتى. زاڭ اياسىندا مىڭداعان ازاماتتىڭ بوستاندىعى مەن جازا مەرزىمى قايتا قارالماق, دەپ حابارلايدى Shalqar.kz.

ماجىلىس وتىرىسىندا سوز سويلەگەن دەپۋتات ابزال قۇسپاننىڭ ايتۋىنشا, بۇل قادام – قاتەلىك جاساعانىمەن, تۇزەلۋگە بەت العان ازاماتتارعا بەرىلەتىن مۇمكىندىك.

«بۇل – مەملەكەتتىڭ ىزگىلىككە نەگىزدەلگەن اكتىسى. وكىنگەن, قاتەلىگىن تۇسىنگەن, تۇزەلگىسى كەلەتىن جاندارعا ەكىنشى مۇمكىندىك بەرۋىمىز كەرەك», – دەدى قۇسپان.

زاڭ جوباسى بويىنشا راقىمشىلىق كەلەسى ساناتتاعى ازاماتتارعا قولدانىلادى:
 • قىلمىستىق تەرىس قىلىق جاساعان,
 • ونشا اۋىر ەمەس نەمەسە ورتاشا اۋىر قىلمىس جاساپ, جازاسىن وتەپ بىتكەن,
 • ورتاشا اۋىر قىلمىستار بويىنشا تەرگەۋ جۇرىپ جاتقان, بىراق ۇكىمى شىقپاعان ازاماتتار.

ال اۋىر جانە اسا اۋىر قىلمىس جاساعاندارعا جازا مەرزىمىنىڭ وتەلمەگەن بولىگى قىسقارتىلۋى مۇمكىن. مىسالى, الاياقتىق جاساپ, كەلتىرىلگەن زالالدى تولىق وتەگەندەر ۇشىن جازا بەستەن بىرگە ازايتىلادى.

دەگەنمەن, مەملەكەتتىك قۇپييالاردى جارييا ەتۋ, سىبايلاس جەمقورلىق سيياقتى مەملەكەت قاۋىپسىزدىگىنە قاتەر توندىرەتىن ىستەرگە راقىمشىلىق قولدانىلمايدى.

قازىرگى تاڭدا قازاقستاندا:
 • 40 مىڭنان استام ادام قاماۋدا وتىر;
 • ونىڭ 33 مىڭى – سوت ۇكىمىمەن جازالانعاندار;
 • 7 مىڭى – تەرگەۋ قاماۋىندا;
 • 27 مىڭنان استام ادام پروباتسييا قىزمەتىنىڭ ەسەبىندە تۇر.

الدىن الا ەسەپ بويىنشا, 6 000 سوتتالعان جانە 9 000 پروباتسييادا تۇرعان ازامات راقىمشىلىققا ىلىگەدى. ولاردىڭ ىشىندە 4 100-ى تولىق بوساتىلسا, 11 000-عا جۋىق ادامنىڭ جازا مەرزىمى قىسقارتىلادى.

زاڭ جوباسى 833 ايەلگە دە قاتىستى بولادى:
 • 109 ايەل تولىق بوساتىلادى,
 • 724-ىنىڭ جازا مەرزىمى قىسقارتىلادى.

سونىمەن قاتار, 629 الەۋمەتتىك وسال ازاماتتىڭ 57-سى بوستاندىققا شىعادى, 572-سى جازا جەڭىلدىگىن الادى.