Қазақстан мен Қытай шекарасында жаңа айналма жол салынады. Бұл жол – транзиттік жүктің негізгі ағынын жеңілдетіп, логистиканың тиімділігін арттыруға бағытталған маңызды жоба. Аталған инфрақұрылым толықтай шетелдік инвестиция есебінен жүзеге аспақ, деп хабарлайды Shalqar.kz.

Бұл туралы ҚР премьер-министрі Олжас Бектенов пен бельгиялық Sarens компаниясының директорлар кеңесінің төрағасы Людо Саренс арасындағы кездесуде айтылды.

Кездесу барысында “Нұр жолы” өткізу бекеті маңынан ұзындығы 3,2 шақырым, ені 12 метр болатын айналма жол салу жобасы талқыланды. Сонымен қатар, жоба аясында 81,6 гектарлық көлік тұрақтары, қосымша автожол көпірі, ірі габаритті және салмағы 100 тоннадан асатын жүк көліктеріне арналған арнайы инфрақұрылым салу жоспарланған.

Инвестиция көлемі — $50 млн
Қаржыландыру — Sarens жеке инвестициясы
Мақсат — өткізу қабілетін арттыру және көлік кептелісін азайту

Премьер-министр Бектенов бұл жобаның Мемлекет басшысы қойған міндеттерге толық сай келетінін айтып, еліміздің көлік-логистикалық әлеуетін дамытудағы рөлін ерекше атап өтті. Сонымен бірге, жауапты мемлекеттік органдарға жобаның уақтылы іске асуына барынша қолдау көрсетуді тапсырды.

Тараптар екіжақты ынтымақтастықты әрі қарай дамытуға ниетті екендерін білдірді.