Астанада өтіп жатқан «Орталық Азия – Қытай» екінші саммитінде Қытай Халық Республикасының төрағасы Си Цзиньпин Орталық Азия елдеріне 1,5 миллиард юань көлемінде қайтарымсыз грант бөлетінін мәлімдеді. Бұл – қазіргі бағаммен 108 миллиард теңгеден астам қаражат, деп хабарлайды Shalqar.kz.

Қытай басшысы бұл көмек халықтың әл-ауқатын арттыруға бағытталған маңызды әлеуметтік жобаларды қолдауға жұмсалатынын айтты.

«2025 жылы Орталық Азия елдеріне 1,5 млрд юань көлемінде қайтарымсыз грант беруге дайынбыз», – деді Си Цзиньпин саммит барысында.

Грант 5 елге беріледі және тұрақты даму бастамаларын жүзеге асыруға көмектеседі.

Сонымен қатар, Қытай 2 жыл ішінде Орталық Азия елдерінен 3 мың адамға кәсіби дайындық курстарын тегін ұсынуға ниетті.

Бұл саммит барысында Қытай мен Орталық Азия арасындағы сауда-экономикалық байланыстарды одан әрі дамыту жолдары талқыланды. Атап айтқанда, Қорғас шекара маңы ынтымақтастығы орталығы өңірлік сауда хабы ретінде жаңғыртылмақ.