Жаздың аптабында демалыс күндерін Бурабайда өткізгісі келетін жолаушыларға жақсы жаңалық! Шілде айының басында «Астана – Бурабай курорты» бағыты бойынша жаңа, заманауи электр пойызы қатынай бастайды, деп хабарлайды Shalqar.kz.

«Қазақстан темір жолы» ұлттық компаниясының мәліметінше, бұл жоба жылжымалы құрамды жаңарту бағдарламасы аясында жүзеге асып отыр. Жаңа пойыз – жай ғана көлік емес, жолаушының жайлылығы мен қауіпсіздігіне баса мән берген жаңа буын құрам.

Не ерекше?
 • Пойыз алты вагоннан тұрады, 374 жолаушыға арналған.
 • Бірінші, екінші және үшінші класты нұсқалары бар.
 • Әр класта биодәретханалар орнатылған, оның ішінде мүмкіндігі шектеулі жандарға арналған арнайы кабиналар да қарастырылған.
 • Платформалық көтергіштер және автоматты аяқ тіректері – егде жастағылар мен балалармен жүрген отбасыларға ыңғайлы.
 • Барлық орындарда USB қосқыштары бар – құрылғыларды қуаттау үшін.
 • Салонда салқын сусындар мен жеңіл тағамдар ұсынылады.

Қазіргі уақытта құрам барлық техникалық сынақтардан өтіп, Кеден одағы регламенттеріне сай құжаттарын рәсімдеп жатыр. Жақын күндері жаңа пойыз толық іске қосылады.

Айта кетейік, бұған дейін осыған ұқсас Comfort+ форматындағы пойыз Астана – Қарағанды бағыты бойынша іске қосылған болатын. Ол 576 жолаушыға арналған еді.