جازدىڭ اپتابىندا دەمالىس كۇندەرىن بۋرابايدا وتكىزگىسى كەلەتىن جولاۋشىلارعا جاقسى جاڭالىق! شىلدە ايىنىڭ باسىندا «استانا – بۋراباي كۋرورتى» باعىتى بويىنشا جاڭا, زاماناۋي ەلەكتر پويىزى قاتىناي باستايدى, دەپ حابارلايدى Shalqar.kz.

«قازاقستان تەمىر جولى» ۇلتتىق كومپانيياسىنىڭ مالىمەتىنشە, بۇل جوبا جىلجىمالى قۇرامدى جاڭارتۋ باعدارلاماسى اياسىندا جۇزەگە اسىپ وتىر. جاڭا پويىز – جاي عانا كولىك ەمەس, جولاۋشىنىڭ جايلىلىعى مەن قاۋىپسىزدىگىنە باسا مان بەرگەن جاڭا بۋىن قۇرام.

نە ەرەكشە?
 • پويىز التى ۆاگوننان تۇرادى, 374 جولاۋشىعا ارنالعان.
 • بىرىنشى, ەكىنشى جانە ۇشىنشى كلاستى نۇسقالارى بار.
 • ار كلاستا بيودارەتحانالار ورناتىلعان, ونىڭ ىشىندە مۇمكىندىگى شەكتەۋلى جاندارعا ارنالعان ارنايى كابينالار دا قاراستىرىلعان.
 • پلاتفورمالىق كوتەرگىشتەر جانە اۆتوماتتى اياق تىرەكتەرى – ەگدە جاستاعىلار مەن بالالارمەن جۇرگەن وتباسىلارعا ىڭعايلى.
 • بارلىق ورىنداردا USB قوسقىشتارى بار – قۇرىلعىلاردى قۋاتتاۋ ۇشىن.
 • سالوندا سالقىن سۋسىندار مەن جەڭىل تاعامدار ۇسىنىلادى.

قازىرگى ۋاقىتتا قۇرام بارلىق تەحنيكالىق سىناقتاردان وتىپ, كەدەن وداعى رەگلامەنتتەرىنە ساي قۇجاتتارىن راسىمدەپ جاتىر. جاقىن كۇندەرى جاڭا پويىز تولىق ىسكە قوسىلادى.

ايتا كەتەيىك, بۇعان دەيىن وسىعان ۇقساس Comfort+ فورماتىنداعى پويىز استانا – قاراعاندى باعىتى بويىنشا ىسكە قوسىلعان بولاتىن. ول 576 جولاۋشىعا ارنالعان ەدى.