ەندى قازاقستاندىقتار پاتەر الاردا زاڭعا قايشى كومپانييالاردىڭ قۇربانى بولماۋى ۇشىن ارنايى ورتالىقتان كەڭەس الا الادى. استانادا وتكەن جيىندا جاڭا باستاما – ۇلەسكەرلەردى قولداۋ ورتالىعى قۇرىلاتىنى بەلگىلى بولدى, دەپ حابارلايدى Shalqar.kz.

بۇل تۋرالى ونەركاسىپ جانە قۇرىلىس مينيسترلىگىنە قاراستى قۇرىلىس سالاسىن دامىتۋ باسقارماسىنىڭ باسشىسى ەرلان كۇلىشەۆ مالىم ەتتى.

“جاڭا زاڭ جوباسى اياسىندا تۇرعىن ۇي قۇرىلىسىنداعى قاۋىپ-قاتەردى ازايتۋ كوزدەلىپ وتىر. قۇرىلىس كوميتەتى جانىنان قۇرىلاتىن بۇل ورتالىق ازاماتتارعا تۇرعىن ۇيدى قاۋىپسىز ساتىپ الۋ جونىندە كەڭەس بەرەدى. سونىمەن قاتار قۇرىلىس كومپانيياسىنىڭ رۇقساتى بار ما, كەپىلدىگى راسىمدەلگەن بە – وسى مالىمەتتەر دە ورتالىقتا قولجەتىمدى بولادى”, – دەدى كۇلىشەۆ.

سونىمەن بىرگە, ەندى مەردىگەرلەرگە بەرىلەتىن اۆانستىق تولەم ليميتى دە ارتادى. ەگەر بانك تاراپىنان كەپىلدىك بولسا, شەكتى مولشەر 25%-دان 50%-عا دەيىن ۇلعايادى.

جيىن بارىسىندا تۇرعىن ۇي قۇرىلىسىنا ۇلەستىك قاتىسۋ ماسەلەلەرى, قۇرىلىس نارىعىنداعى پروبلەمالار جانە كەپىلدىك راسىمدەرىن جەڭىلدەتۋ جايى دا تالقىلاندى. باسقوسۋعا مەملەكەتتىك ورگاندار, قۇرىلىس كومپانييالارى مەن بيزنەس وكىلدەرى قاتىستى.