2025 жылы магистратураға түсуге ниетті жастар үшін маңызды кезең басталды. Қазақстанда кешенді тестілеуге өтініштер қабылдау 1 маусымнан басталып, 8 шілдеге дейін жалғасады. Тіркеу тек онлайн жүргізіледі – app.testcenter.kz платформасы арқылы.

Кешенді тестілеу 20 шілде мен 10 тамыз аралығында өтеді. Қатысу құны – 14 693 теңге, төлем онлайн төленеді, тек төлем жасалған соң ғана өтініш тіркеуге алынады.

Бейінді магистратура: қысқа мерзім, нақты талап
 • Оқу мерзімі: 1–1,5 жыл
 • Тест құрылымы: тек 1 бөлім – бейінді пәндер бойынша
 • 1-пәннен – 30 сұрақ (бір дұрыс жауап)
 • 2-пәннен – 20 сұрақ (бірнеше дұрыс жауап)
 • Жалпы балл: 70
 • Тест уақыты: 100 минут
 • Шекті балл:
 • Әр пәннен – кемінде 7 балл
 • Жалпы – кемінде 30 балл (грант немесе ақылы оқуға қатысу үшін)

Ғылыми-педагогикалық магистратура: 3 бөлім, жоғары шектеу
 • Оқу мерзімі: 2 жыл
 • Тест құрылымы:
 1. Шет тілі
 2. Оқуға дайындығын анықтайтын тест
 3. Бейінді пәндер бойынша тест
 • Жалпы тапсырма саны: 100
 • Тест уақыты: 3 сағат 55 минут
 • Шекті балл:
 • Шет тілі – кемінде 25 балл
 • Оқу дайындығы – кемінде 7 балл
 • Әр бейінді пәннен – кемінде 7 балл
 • Жалпы – 75 балдан төмен болмауы керек

Халықаралық шет тілі сертификаты бар ма? Артықшылық бар!

TOEFL, IELTS секілді халықаралық сертификаты бар талапкерлер шет тілі тестінен босатылады – тек ғылыми-педагогикалық бағытта және қалауы бойынша. Бұл – уақыт пен күшті үнемдейтін маңызды мүмкіндік.

8 шілдеге дейін тест тапсыратын қаланы, білім беру бағдарламасын, тілін өзгертуге болады. Бірақ тіркеу жабылғаннан кейін өзгеріс енгізілмейді. Ал нақты тест уақыты мен орны 14 шілдеден бастап жеке кабинетте көрсетіледі.