2025 جىلى ماگيستراتۋراعا تۇسۋگە نيەتتى جاستار ۇشىن ماڭىزدى كەزەڭ باستالدى. قازاقستاندا كەشەندى تەستىلەۋگە وتىنىشتەر قابىلداۋ 1 ماۋسىمنان باستالىپ, 8 شىلدەگە دەيىن جالعاسادى. تىركەۋ تەك ونلاين جۇرگىزىلەدى – app.testcenter.kz پلاتفورماسى ارقىلى.

كەشەندى تەستىلەۋ 20 شىلدە مەن 10 تامىز ارالىعىندا وتەدى. قاتىسۋ قۇنى – 14 693 تەڭگە, تولەم ونلاين تولەنەدى, تەك تولەم جاسالعان سوڭ عانا وتىنىش تىركەۋگە الىنادى.

بەيىندى ماگيستراتۋرا: قىسقا مەرزىم, ناقتى تالاپ
 • وقۋ مەرزىمى: 1–1,5 جىل
 • تەست قۇرىلىمى: تەك 1 بولىم – بەيىندى پاندەر بويىنشا
 • 1-پاننەن – 30 سۇراق (بىر دۇرىس جاۋاپ)
 • 2-پاننەن – 20 سۇراق (بىرنەشە دۇرىس جاۋاپ)
 • جالپى بالل: 70
 • تەست ۋاقىتى: 100 مينۋت
 • شەكتى بالل:
 • ار پاننەن – كەمىندە 7 بالل
 • جالپى – كەمىندە 30 بالل (گرانت نەمەسە اقىلى وقۋعا قاتىسۋ ۇشىن)

عىلىمي-پەداگوگيكالىق ماگيستراتۋرا: 3 بولىم, جوعارى شەكتەۋ
 • وقۋ مەرزىمى: 2 جىل
 • تەست قۇرىلىمى:
 1. شەت تىلى
 2. وقۋعا دايىندىعىن انىقتايتىن تەست
 3. بەيىندى پاندەر بويىنشا تەست
 • جالپى تاپسىرما سانى: 100
 • تەست ۋاقىتى: 3 ساعات 55 مينۋت
 • شەكتى بالل:
 • شەت تىلى – كەمىندە 25 بالل
 • وقۋ دايىندىعى – كەمىندە 7 بالل
 • ار بەيىندى پاننەن – كەمىندە 7 بالل
 • جالپى – 75 بالدان تومەن بولماۋى كەرەك

حالىقارالىق شەت تىلى سەرتيفيكاتى بار ما? ارتىقشىلىق بار!

TOEFL, IELTS سەكىلدى حالىقارالىق سەرتيفيكاتى بار تالاپكەرلەر شەت تىلى تەستىنەن بوساتىلادى – تەك عىلىمي-پەداگوگيكالىق باعىتتا جانە قالاۋى بويىنشا. بۇل – ۋاقىت پەن كۇشتى ۇنەمدەيتىن ماڭىزدى مۇمكىندىك.

8 شىلدەگە دەيىن تەست تاپسىراتىن قالانى, بىلىم بەرۋ باعدارلاماسىن, تىلىن وزگەرتۋگە بولادى. بىراق تىركەۋ جابىلعاننان كەيىن وزگەرىس ەنگىزىلمەيدى. ال ناقتى تەست ۋاقىتى مەن ورنى 14 شىلدەدەن باستاپ جەكە كابينەتتە كورسەتىلەدى.