اتىراۋ وبلىسىندا سۋ تاسقىنىنىڭ الدىن الۋعا باعىتتالعان اۋقىمدى جوبا جۇزەگە اسىرىلۋدا. جايىق وزەنىنەن كاسپيي تەڭىزىنە دەيىن سوزىلاتىن سوكولوك كانالى بويىنا ۇزىندىعى 33 شاقىرىمدىق الىپ بوگەت تۇرعىزىلۋدا, دەپ حابارلايدى Shalqar.kz.

جوبانىڭ باستى ماقساتى – كوكتەمگى تاسقىن كەزىندە جايىق وزەنىنەن اعاتىن ارتىق سۋدى اتىراۋ قالاسىنا كىرگىزبەي, بىردەن كاسپييگە بۇرۋ. بوگەتتىڭ بيىكتىگى – 3 مەتر, ەنى – 6 مەترگە دەيىن جەتەدى. سونىمەن قاتار, كانال ارناسى 15-تەن 50 مەترگە دەيىن كەڭەيتىلىپ, تۇبى 2 مەترگە تەرەڭدەتىلگەن.

«بۇعان دەيىن كانال بولعانىمەن, ارتىق سۋدى ۇستاپ قالاتىن بوگەت بولماعان ەدى. قۇرىلىس 1 ناۋرىزدا باستالدى, جەلتوقساندا اياقتاۋ جوسپارلانىپ وتىر. قازىر 25 تەحنيكا مەن 57 مامان تاۋلىك بويى جۇمىس ىستەۋدە», – دەيدى جوبانىڭ جەتەكشىسى نۇرلان نۇرباەۆ.

جاقىن ماڭداعى شارۋالار جاڭا بوگەتكە ريزا. ويتكەنى بۇرىن كوكتەم سايىن شابىندىق پەن مال جايىلىمدارىنا قاۋىپ تونەتىن. ەندى بۇل تاۋەكەل جويىلادى. قۇرىلىس جۇمىستارىن «ستروي ستاتۋس كز» جشس جۇزەگە اسىرۋدا.

ايتا كەتەيىك, سوكولوك كانالىنىڭ جالپى ۇزىندىعى – 43,6 شاقىرىم. ونىڭ ۇشتەن ەكى بولىگى قازىر قايتا جاڭارتىلىپ جاتىر. بۇل – تەك ينجەنەرلىك ەمەس, الەۋمەتتىك ماڭىزى دا زور باستاما.