قازاقستاندا زەينەتاقىلار, جاردەماقىلار مەن الەۋمەتتىك تولەمدەر ايتارلىقتاي كوبەيەدى. بۇل تۋرالى 23 ماۋسىمدا وتكەن سەنات وتىرىسىندا پرەمьەر-مينيستردىڭ ورىنباسارى – ۇلتتىق ەكونوميكا مينيسترى سەرىك جۇمانعارين مالىمدەدى, دەپ حابارلايدى Shalqar.kz.

مينيستردىڭ ايتۋىنشا, بۇل ماقساتقا بيۋدجەتتەن شامامەن 800 ميلليارد تەڭگە بولىنەدى.

“زەينەتاقىلاردى, جاردەماقىلار مەن الەۋمەتتىك تولەمدەردى يندەكساتسييالاۋعا بىز شامامەن 800 ميلليارد تەڭگە قاراستىردىق. بيۋدجەت ونى كوتەرە الادى, سوندىقتان الەۋمەتتىك جاعىنان وسال توپتار ۇشىن اسا ۇلكەن كۇيزەلىس بولمايدى دەپ ويلايمىن”, – دەدى سەرىك جۇمانعارين.

سونداي-اق مينيستر بىرىنشى جانە ەكىنشى توپتاعى مۇگەدەكتىگى بار ادامدار ۇشىن سالىق سالىنبايتىن تابىس كولەمى 289 مىڭ تەڭگەدەن 1,6 ميلليون تەڭگەگە دەيىن ۇلعايتىلعانىن اتاپ وتتى. بۇل شەشىم 350 مىڭ سالىق تولەۋشىگە 12 ميلليارد تەڭگە ۇنەمدەۋگە مۇمكىندىك بەرەدى.

بۇعان قوسا, جۇمانعارين قوسىمشا قۇن سالىعى 2026 جىلدان باستاپ 20%-عا وسەتىنىن, وسىعان بايلانىستى كاسىپورىنداردىڭ ونىم مەن قىزمەت باعاسىن الدىن الا كوتەرىپ ۇلگەرگەنىن ايتتى. قازىردىڭ وزىندە ازىق-تۇلىك 9,6%-عا, قىزمەتتەر 15-16%-عا قىمباتتاعان.

دەگەنمەن, مينيستر ۇكىمەتتىڭ قىزمەت كورسەتۋ سالاسىنداعى باعانىڭ وسۋىن تەجەۋگە كۇش سالىپ جاتقانىن اتاپ وتتى.