قازاقستان ەۋروپا كەڭىستىگىندەگى قىلمىسقا قارسى ىنتىماقتاستىق جۇيەسىنە رەسمي تۇردە قادام باستى. 2025 جىلعى 18 ماۋسىمدا ەۋروپا كەڭەسىنىڭ مينيسترلەر كوميتەتى ەلىمىزدىڭ قىلمىستىق ىستەر بويىنشا قۇقىقتىق كومەك كورسەتۋ تۋرالى كونۆەنتسيياعا قوسىلۋ وتىنىمىن ماقۇلدادى, دەپ حابارلايدى Shalqar.kz.

بۇل باستاماعا قازاقستان رەسپۋبليكاسىنىڭ باس پروكۋراتۋراسى جەتەكشىلىك ەتتى. ەندى ەلىمىز 46 ەۋروپالىق مەملەكەتپەن قىلمىستىق ىستەر بويىنشا بىرلەسىپ جۇمىس ىستەۋگە, دالەلدەمەلەر الماسۋعا جانە شەتەلگە زاڭسىز شىعارىلعان اكتيۆتەردى قايتارۋعا تولىققاندى مۇمكىندىك الادى.

«مۇنداي شاقىرتۋدى الۋ – قازاقستاننىڭ قىلمىستىق قۇقىقتىق جۇيەسىنە, ونىڭ ىشىندە زاڭ ۇستەمدىگىنە, ادام قۇقىقتارى مەن بوستاندىقتارىنىڭ ساقتالۋىنا ەۋروپالىق قاۋىمداستىق تاراپىنان سەنىمنىڭ بەلگىسى جانە قازاقستاندىق پروكۋرورلار مەن ديپلوماتتاردىڭ كوپجىلدىق قاجىرلى ەڭبەگىنىڭ ناتيجەسى بولىپ تابىلادى», – دەلىنگەن باس پروكۋراتۋرانىڭ حابارلاماسىندا.

بۇل قادام “زاڭ مەن تارتىپ” تۇجىرىمداماسىنا تولىق سايكەس كەلەدى جانە ەلىمىزدىڭ حالىقارالىق قۇقىقتىق سەرىكتەستىگىن جاڭا دەڭگەيگە كوتەرمەك. ەندى قازاقستان اربىر ەلمەن جەكە شارت جاساماي-اق, بارلىق تاراپتارمەن قۇقىقتىق كومەك مەحانيزمىن بىر مەزگىلدە ىسكە قوسا الادى.

ايتا كەتەيىك, قازاقستان بۇل كونۆەنتسيياعا قوسىلۋ ۇشىن 20 جىلدان استام ۋاقىت بويى ارەكەت ەتىپ كەلگەن. بۇرىنعى وتىنىمدەر كەيبىر ەۋروپا ەلدەرىنىڭ قارسىلىعىنا بايلانىستى قابىلدانباي كەلگەن ەدى. وسى جولى حالىقارالىق قاۋىمداستىق ەلىمىزدىڭ رەفورمالارى مەن زاڭنامالىق جۇيەسىنە سەنىم ارتتى.