Петропавлда елдегі алғашқы модульдік құтқару станциясы ашылды. Бұл бастама Төтенше жағдайлар министрлігі тарапынан жүзеге асырылып отыр, деп хабарлайды Shalqar.kz.

Станция Есіл өзенінің жағасында орналасқан және тәулік бойы жұмыс істеуге бейімделген. Мұнда құтқарушылар үшін барлық жағдай жасалған: жұмыс аймағы, демалыс бөлмесі, ас үй, қосалқы бөлме. Ғимарат энергия үнемдейтін материалдардан салынып, электрлік жылыту жүйесімен жабдықталған.
Су айдынына жедел жету үшін арнайы пирс пен баспалдақ орнатылған. Жаңа станция Есілдің жағалауын, автомобиль көпірі мен су электр кешенін бақылайды.
Министрдің айтуынша, бұл — пилоттық жоба және болашақта өзге аймақтарда да енгізілуі мүмкін. Жыл басынан бері СҚО құтқарушылары 1200-ден астам рет шақыртуға шығып, 135 адамды құтқарып қалған.