Қазақстанда онлайн несие рәсімдеуге қатысты ережелер қатаңдатылмақ. Қаржы нарығын реттеу және дамыту агенттігі жаңа қаулы жобасын әзірлеп, оны көпшілік талқысына ұсынды, деп хабарлайды Shalqar.kz.

Жобаға сәйкес, егер кепілсіз онлайн несие сомасы 150 АЕК-тен (шамамен 690 мың теңге) асып кетсе, ақша келісімшартқа қол қойылғаннан кейін бірден емес, 24 сағаттан кейін беріледі. Қаражат тек eGov сияқты платформалар арқылы клиент растау жасаған соң аударылады.
Сондай-ақ, «суыту кезеңі» енгізіледі. Егер азамат бір күн ішінде бірнеше несие рәсімдеп, жалпы сома 150 АЕК-тен асса, банк немесе МҚҰ қосымша несие беруге тыйым салады.
Ал ірі несие рәсімдейтіндер, сондай-ақ 21 жасқа дейінгі және 55 жастан асқан азаматтар тек банкке немесе МҚҰ-ға келіп, келісімге жазбаша түрде қол қоюы қажет.
Сонымен бірге, банктік омбудсмен болғысы келетіндер қазақ тілін B2 деңгейінде меңгергенін ҚАЗТЕСТ арқылы дәлелдеуге тиіс.