قازاقستاندىقتار ۇلتتىق ەلەكتروندى كىتاپحانا قىزمەتىن بەلسەندى قولدانا باستادى. 2025 جىلدىڭ العاشقى جارتىسىندا Kazneb.kz پورتالىنىڭ پايدالانۋشىلارى 44%-عا ارتتى, دەپ حابارلايدى Shalqar.kz.

كونتەنت قارالىمى 4 ميلليوننان اسىپ, قۇجات جۇكتەۋ سانى 1,6 ميلليونعا جەتتى. ەلەكتروندى بازا 2 758 جاڭا قۇجاتپەن تولىقتى. جالپى قوردا 81 357 قۇجات ساقتاۋلى, ولار 64 تىلدە قولجەتىمدى.

مينيسترلىك مالىمەتىنشە, كەز كەلگەن ادام اۆتوريزاتسيياسىز-اق پورتالعا كىرىپ, قۇجاتتارمەن ەركىن تانىسا الادى. Kazneb پورتالىنا 110 ەلدەن قولدانۋشىلار كىرىپ وتىر. قازاقستاننان بولەك, رەسەي, اقش, گەرمانييا, وزبەكستان, نيدەرلاندى سيياقتى ەلدەر الدىڭعى قاتاردا. پورتال كوزى ناشار كورەتىندەر ۇشىن دە قولجەتىمدى.