Қазақстанда IT-маман болғысы келетіндерге үлкен мүмкіндік туып отыр: Tech Orda бағдарламасы аясында 500 000 теңгеге дейін грант берілетін жаңа курс легіне өтінім қабылдау басталды, деп хабарлайды Shalqar.kz.

18–45 жас аралығындағы азаматтар Astana Hub арқылы 2025 жылғы 3 қыркүйекке дейін өтініш бере алады. Биыл бағдарламаға 80 IT-мектеп қатысып, 160-тан аса бағыт бойынша оқыту жүргізіледі.

Бағдарлама қатысушыларына веб-әзірлеу, Big Data, мобильді қосымшалар, AR/VR, киберқауіпсіздік, жасанды интеллект секілді сұранысқа ие салалар ұсынылады.

Министр Жаслан Мадиевтің айтуынша, бағдарлама мыңдаған адам үшін әлеуметтік сатыға айналып, Kaspi.kz, Halyk Bank, Air Astana сияқты компанияларға жол ашқан.

2024 жылы 3 465 грант бөлінсе, оның 1 000-ы мұғалімдерге арналған. Бағдарлама түлектерінің 88 пайызы жұмысқа орналасып, орташа жалақысы 505 000 теңгені құрап отыр.