2025–2026 وقۋ جىلىنا ارنالعان مەملەكەتتىك بىلىم گرانتتارىنىڭ يەگەرلەرى انىقتالدى. بۇل تۋرالى عىلىم جانە جوعارى بىلىم مينيسترلىگى رەسمي مالىمدەدى, دەپ حابارلايدى Shalqar.kz.

پرەزيدەنت قاسىم-جومارت توقاەۆتىڭ تاپسىرماسىنا سايكەس, بيىلعى گرانتتاردىڭ 60%-ى ينجەنەرلىك جانە تەحنيكالىق باعىتتارعا بولىندى. ياعني, ەلىمىزدە بولاشاق ينجەنەرلەر مەن تەحنولوگييا سالاسىنىڭ ماماندارىنا ەرەكشە مان بەرىلىپ وتىر. گرانتتار كونكۋرس ارقىلى تاعايىندالىپ, 99%-ى يگەرىلدى.

«سەرپىن» باعدارلاماسى اياسىندا وڭتۇستىكتەن كەلگەن جاستارعا ەرەكشە مۇمكىندىك بەرىلدى. 2 مىڭنان استام تالاپكەر ەلىمىزدىڭ سولتۇستىك, شىعىس جانە ورتالىق ايماقتارىنداعى ۇزدىك جوو-لارعا وقۋعا تۇسەدى.

«AMANAT» پارتيياسىنىڭ سايلاۋالدى باعدارلاماسىن جۇزەگە اسىرۋ ماقساتىندا بيىل 77 مىڭنان استام گرانت بولىندى. وعان قوسا, الەمدىك دەڭگەيدەگى ۋنيۆەرسيتەتتەرمەن سەرىكتەستىك ورناتقان وتاندىق 20-عا جۋىق جوعارى وقۋ ورنى تالاپكەرلەردى قابىلداي باستادى. بۇل قادام قازاقستاندى وڭىرلىك بىلىم حابىنا اينالدىرۋعا باعىتتالعان.

بيىلعى گرانت كونكۋرسىنا 113 مىڭعا جۋىق وتىنىش كەلىپ تۇسكەن. بۇل وتكەن جىلمەن سالىستىرعاندا 9 مىڭعا كوپ. سونداي-اق الەۋمەتتىك وسال توپتار ۇشىن زاڭنامادا بەكىتىلگەن كۆوتا جۇيەسى ساقتالعان.

دارىندى جاستار ۇشىن حالىقارالىق وليمپيادالار مەن سپورت جارىستارىنىڭ جەڭىمپازدارىنا كونكۋرسسىز گرانت بەرۋ دە قاراستىرىلعان. سونىمەن بىرگە, بىلىمگە قولجەتىمدىلىكتى ارتتىرۋ ۇشىن قوسىمشا باعدارلامالار ىسكە قوسىلدى.

اتاپ ايتقاندا, بيىلدان باستاپ «كەلەشەك» بىرىڭعاي جيناقتاۋ جۇيەسى ەنگىزىلدى. بۇل جۇيە ارقىلى 5 جاسار بالاعا ەسەپشوت اشىپ, بولاشاق بىلىم الۋعا كاپيتال جيناۋعا بولادى. سونىمەن قاتار, 2024 جىلى العاش رەت سارالانعان گرانتتار ەنگىزىلدى. ونىڭ اياسىندا مەملەكەت شىعىننىڭ بىر بولىگىن عانا تولەيدى, ال قالعانىن جەڭىلدەتىلگەن نەسيە نەمەسە جەكە قاراجاتپەن جابۋعا بولادى. 2025 جىلى مۇنداي گرانت سانى 300-گە جەتپەك.

العاش رەت مەرزىمدى اسكەري قىزمەتتە جۇرگەن ازاماتتار ۇشىن دە 2010 گرانت بولىندى. بۇل شارا اسكەردەن كەيىن ولاردىڭ بەيىمدەلۋىن جەڭىلدەتىپ, جوعارى بىلىم الۋعا مۇمكىندىك بەرەدى.

گرانت يەگەرلەرى تۋرالى تولىق اقپاراتتى مىنا سىلتەمەلەردەن بىلۋگە بولادى:

📎 https://www.gov.kz/memleket/entities/sci?lang=kk

📎 https://t.me/gylym_jogary_bilim

📎 https://t.me/SayasatNurbek

📎 https://www.testcenter.kz

گرانت تۋرالى كۋالىك 3 جۇمىس كۇنى ىشىندە https://grant.testcenter.kz سايتىندا قولجەتىمدى بولادى. جوعارى وقۋ ورىندارىنا قۇجات تاپسىرۋ 25 تامىزعا دەيىن جۇرگىزىلەدى.