2026 جىلى قازاقستاندا كوممۋنالدىق قىزمەت تاريفتەرى 20-30% ارالىعىندا وسەدى دەپ كۇتىلۋدە. بۇل تۋرالى تابيعي مونوپولييالاردى رەتتەۋ كوميتەتىنىڭ توراعاسى تيمۋر قوسىمباەۆ مالىمدەدى. ونىڭ ايتۋىنشا, وسىم كۇرت بولمايدى, ال ەڭ باستىسى – الەۋمەتتىك السىز توپتاردى قولداۋدىڭ ناقتى تەتىكتەرى قاراستىرىلعان, دەپ حابارلايدى Shalqar.kz.

ۇلتتىق جوبالار اياسىندا تاريفتەرگە سالماقتى ازايتۋ ۇشىن سۋبسيدييالاۋ جۇيەسى ەنگىزىلەدى. ياعني, قىزمەت كورسەتۋ ۇيىمدارىنىڭ نەسيە شىعىندارى مەن نەگىزگى قارىزدار تاريفكە بىرتىندەپ قوسىلادى. وسى كەزدە رەسپۋبليكالىق بيۋدجەت ەسەبىنەن پايىزدىق مولشەرلەمەنىڭ بىر بولىگىنە وتەماقى بەرىلەدى – ناقتىراق ايتقاندا, سىياقىنىڭ 10%-ى عانا تۇتىنۋشىعا جۇكتەلەدى, قالعانىن مەملەكەت وتەيدى.

“قازىر بىر بولمەلى پاتەردىڭ ورتاشا كوممۋنالدىق تولەمى شامامەن 25 مىڭ تەڭگەنى قۇرايدى. كەلەسى جىلى بۇل سوما 28-30 مىڭ تەڭگەگە دەيىن وسۋى مۇمكىن”, – دەدى قوسىمباەۆ ۇكىمەت بريفينگىندە. ونىڭ ايتۋىنشا, ەكى بولمەلى پاتەر يەلەرى 5–7 مىڭ تەڭگەگە ارتىق تولەۋى ىقتيمال.

الايدا مەملەكەت بۇل وزگەرىستەرگە قارسى تۇرۋ ۇشىن بىرقاتار قولداۋ مەحانيزمىن ۇسىنىپ وتىر. اتاپ ايتقاندا, از قامتىلعان وتباسىلار مەن زەينەتكەرلەرگە ارنالعان تۇرعىن ۇي كومەگى جالعاسادى. تۇتىنۋشى ارنايى وتىنىش بەرگەن جاعدايدا كوممۋنالدىق تولەمدەردىڭ بىر بولىگى مەملەكەت تاراپىنان وتەلەدى.

ەستەرىڭىزگە سالا كەتەيىك, بۇرىن جارييالانعان مالىمەتكە سايكەس, ەگەر كوممۋنالدىق تولەمدەر وتباسىنىڭ تابىسىنىڭ 5%-ىنان اسىپ كەتسە, ارتىق سومانى اكىمدىك وتەيدى. بۇل – الەۋمەتتىك تەڭدىكتى ساقتاۋ ماقساتىنداعى ماڭىزدى قادام.