Алматыда 1 тамыз күні өткен Дженнифер Лопестің көптен күткен концертіне 27 мыңнан астам көрермен жиналды. Қала әкімдігінің мәліметінше, ауқымды іс-шара 10 млрд теңгеден астам табыс әкелген, деп хабарлайды Shalqar.kz

Әкімдік қорытындысына сүйенсек, Орталық стадиондағы шоуды 35 елден келген 7 мың шетелдік тамашалаған. Қаржылық көрсеткіштер де көңіл қуантарлық: шамамен 600 млн теңге салық түскен, ал туристердің өзі Алматыда бір күнде 5 млрд теңгеден астам қаражат қалдырған.

Әншінің турының бас режиссері Григорий Антропов Алматыдағы дайындықты әлемдік деңгейдегі үздік ұйымдастыру деп бағалады. Әкімдік өкілдерінің айтуынша, мұндай ірі мәдени шаралар Алматының халықаралық гастрольдік картадағы беделін арттырып, қаланың туристік тартымдылығын еселей түседі.