قازاقستاندا ەندى وقۋشىلاردى بىر مەكتەپتەن ەكىنشى مەكتەپكە اۋىستىرۋ راسىمى جەڭىلدەدى. اتا-انالار مەن زاڭدى وكىلدەر بۇل قىزمەتتى eGov.kz پورتالى ارقىلى ونلاين تۇردە جاساي الادى, دەپ حابارلايدى Shalqar.kz وقۋ-اعارتۋ مينيسترلىگىنىڭ باسپاسوز قىزمەتىنە سىلتەمە جاساپ.

وقۋ-اعارتۋ مينيسترلىگىنىڭ مالىمەتىنشە, اتا-انا تۇرعىلىقتى جەرىنە قاراي نەمەسە قالاعان وزگە بىلىم ورداسىن تاڭداپ, وتىنىشتى ەلەكتروندى تۇردە بەرە الادى. ەندى ەسەپتەن شىعارۋ قاعازى, بەكىتۋ تالوندارى نەمەسە جەكە ىس قۇجاتتارىن جيناۋدىڭ قاجەتى جوق. وتىنىش بەرۋشى وقۋ تىلىن وزى تاڭداپ, قاجەت جاعدايدا وتىنىشىن قايتارىپ الا الادى.

قىزمەتتى الۋ ۇشىن eGov.kz پورتالىندا تىركەلىپ, “بىلىم” → “ورتا بىلىم” بولىمىنەن “بالالاردى مەكتەپتەن مەكتەپكە اۋىستىرۋ” قىزمەتىن تاڭداپ, ەتسق ارقىلى قول قويۋ جەتكىلىكتى. ناتيجە جەكە كابينەتتە كورسەتىلەدى.