قازاقستاندا بىلىم بەرۋ سالاسىندا جاڭا تاجىريبە قولعا الىنباق. مەكتەپ باعدارلاماسىنداعى بىرقاتار پاندەردى بىرىكتىرىپ وقىتۋ جوسپارلانىپ وتىر, دەپ حابارلايدى Shalqar.kz

ۇكىمەت ۇيىندە وتكەن باسپاسوز جيىنىندا وقۋ-اعارتۋ مينيسترى عاني بەيسەمباەۆ پيلوتتىق جوبانىڭ مان-جايىن تۇسىندىردى. ونىڭ ايتۋىنشا, الداعى ۋاقىتتا الگەبرا مەن گەومەترييا “ماتەماتيكا” پانى اياسىندا بىرىكتىرىلمەك. ال تاريح پەن قۇقىق نەگىزدەرى “قوعامدىق عىلىمدار” ساباعىنا توپتاستىرىلادى.

“كوتەرىلگەن ماسەلە پيلوتتىق جوبا رەتىندە جۇزەگە اسىرىلادى. مامانداردىڭ ۇسىنىسى بويىنشا الگەبرا مەن گەومەتريياعا قاتىستى كوپتەگەن سۇراقتار تۋىندادى”, – دەدى مينيستر.

بۇل قادام حالىقارالىق بىلىم بەرۋ ۇردىستەرىمەن دە ۇندەس. پانارالىق وقىتۋ ارقىلى وقۋشىلاردىڭ ماتەريالدى جەڭىل قابىلداۋى, تاقىرىپتاردىڭ قايتالانباۋى جانە وقۋ باعدارلاماسىنىڭ تيىمدىلىگى ارتادى دەپ كۇتىلۋدە.

مينيستردىڭ ايتۋىنشا, وزگەرىستەر بىردەن بارلىق مەكتەپكە ەنگىزىلمەيدى. ەكسپەريمەنت الدىمەن 20 وبلىستىڭ تاڭداۋلى مەكتەپتەرىندە جۇرگىزىلەدى. ناتيجەلەر سارالانعاننان كەيىن عانا ونى جالعاستىرۋ نەمەسە بۇرىنعى جۇيەگە ورالۋ تۋرالى شەشىم قابىلدانباق.

سونداي-اق عاني بەيسەمباەۆ بۇل جوبا مۇعالىمدەردىڭ جۇمىس ورنىنا اسەر ەتپەيتىنىن اتاپ وتتى. “مۇعالىمدەردىڭ جۇمىس ورنى ساقتالادى, ىسكە اسىرۋ كەزىندە مەكتەپتەردىڭ كادرلىق دەڭگەيىن ەسكەرەمىز”, – دەدى ول.

ەكسپەريمەنتكە قاتىساتىن مەكتەپتەردىڭ ناقتى تىزىمى كەيىنىرەك جارييالانادى.