قازاقستاندا مەملەكەتتىك كىرىستەر ورگاندارىنا ازاماتتاردىڭ بانك شوتتارىن تەكسەرۋگە رۇقسات بەرىلۋى ىقتيمال. ەگەر جاڭا تالاپ كۇشىنە ەنسە, شەنەۋنىكتەر قازاقستاندىقتاردىڭ شوتىنداعى قاراجات قالدىعىن عانا ەمەس, ولاردىڭ جۇمسالۋ باعىتىن دا كورە الادى, دەپ حابارلايدى Shalqar.kz.

قارجى مينيسترلىگى ازىرلەگەن بۇيرىق جوباسىنا سايكەس, ۇكىمەت بانكتەردى وز كليەنتتەرى تۋرالى بەلگىلى بىر اقپاراتتى مەملەكەتتىك كىرىستەر ورگاندارىنا بەرۋگە مىندەتتەي الادى. ەگەر قۇجات قابىلدانسا, بانكتەر كەلەسى دەرەكتەردى ۇسىنۋعا تيىس بولادى:

 • شوتتاردىڭ بار ەكەنى جانە ولاردىڭ نومىرلەرى تۋرالى اقپارات;

 • قاراجات قالدىعى مەن قوزعالىسى جونىندەگى مالىمەتتەر;

 • الىنعان نەسيەلەر تۋرالى دەرەكتەر;

 • 20 000 ايلىق ەسەپتىك كورسەتكىشتەن (2025 جىلى – 78,64 ملن تەڭگە) اساتىن مۇلىك ساتىپ العان ازاماتتاردىڭ شوتىنداعى قاراجات قالدىعى مەن قوزعالىسى.

بۇل تالاپ اكتيۆتەر مەن مىندەتتەمەلەر (250.00-نىسان) جانە كىرىستەر مەن مۇلىك (270.00-نىسان) تۋرالى دەكلاراتسييا تاپسىرۋعا مىندەتتى تۇلعالارعا قاتىستى بولماق.

جاڭا ەرەجەلەردىڭ ماقساتى – ازاماتتاردىڭ كىرىستەرى مەن مۇلكىن اشىق قاداعالاۋ, سالىقتى ادىل تولەۋدى قامتاماسىز ەتۋ, بيۋدجەت كىرىستەرىن ارتتىرۋ جانە كولەڭكەلى ەكونوميكانى ازايتۋ.

قارجى مينيسترلىگى قۇجات جوباسىن 2025 جىلدىڭ 9 قىركۇيەگىنە دەيىن قوعامدىق تالقىلاۋعا شىعاردى.