الماتىدا حالىقارالىق دەڭگەيدەگى جاڭا فۋتبول ستاديونى سالىنباق. جوبا 35 مىڭ كورەرمەنگە ەسەپتەلگەن جانە ۋەفا-نىڭ 4-سانات تالاپتارىنا تولىق سايكەس كەلەدى, دەپ حابارلايدى Shalqar.kz.

جاڭا سپورتتىق نىسان قۇلجا مەن تالعار تاس جولدارىنىڭ اراسىندا, شامامەن 15 گەكتار اۋماقتا بوي كوتەرەدى. ديزاين جوباسىندا جاتتىعۋ الاڭدارى, جانكۇيەرلەرگە ارنالعان دەمالىس ايماقتارى, زاماناۋي قاۋىپسىزدىك جۇيەلەرى جانە كەڭ اۋقىمدى اباتتاندىرۋ جۇمىستارى قاراستىرىلعان. بۇل ورىن بولاشاقتا قالا ۇشىن كولىك-لوگيستيكالىق حابقا اينالىپ, كورەرمەندەر مەن قوناقتارعا بارىنشا قولايلى جاعداي جاساماق.

قالا اكىمى دارحان ساتىبالدىنىڭ ايتۋىنشا, پرەزيدەنتتىڭ تاپسىرماسىنا سايكەس قۇرىلىس جۇمىستارى جەدەلدەتىلەدى. «كەلەر جىلى قۇرىلىس-مونتاج جۇمىستارى باستالۋعا تيىس. 2026 جىلى بۇل جۇمىستاردى تولىق قولعا الامىز. سونداي-اق, بۇل اۋماقتا مەترو ستانتسيياسىن جانە الماتى لوگيستيكالىق حابىن سالۋ جوسپاردا بار», – دەدى ول.

سونىمەن قاتار, الماتى سپورت تاريحىنىڭ بىر بولىگى بولىپ سانالاتىن 65 جىلدان استام تاريحى بار ورتالىق ستاديون ساقتالىپ, ونىڭ جەڭىل اتلەتيكا ينفراقۇرىلىمى جاڭعىرتىلماق.