Қазақстан Президенті Қасым-Жомарт Тоқаев барша қазақстандықтарды Конституция күнімен құттықтады. Мемлекет басшысының құттықтау хаты Ақорданың ресми сайтында жарияланды, деп хабарлайды Shalqar.kz.

Президент өз сөзінде осыдан 30 жыл бұрын өткен референдумда халқымыз тарихи таңдау жасап, Ата заңды қабылдағанын атап өтті. Тоқаевтың айтуынша, Конституция тәуелсіздігіміздің тірегі әрі мемлекеттілігіміздің мызғымас іргетасы болып табылады.

“Құрметті отандастар! Баршаңызды Конституция күнімен құттықтаймын! Осыдан 30 жыл бұрын өткен референдумда халқымыз Ата заңын қабылдап, тарихи таңдауын жасады. Конституциямыз Қазақстан Республикасы тәуелсіздігінің, қазақ мемлекеттілігінің берік тұғырына айналды. Онда ұлтымыздың бүгінін және болашағын айқындайтын мызғымас құндылықтар мен қағидаттар нақты көрініс тапты. Ата заң Қазақстанның барлық азаматының мүддесін ұлтына, дініне қарамастан бірдей қорғайтын әлеуметтік мемлекет ретіндегі құқықтық іргетасын қалыптастырды.

Конституция қоғамдық келісім мен ішкі тұрақтылықтың басты кепілі саналады. Сан түрлі саладағы жетістіктерге осы негізгі заңымызға сүйене отырып қол жеткіздік. Үш жыл бұрын ел дамуының жаңа тарихи кезеңіндегі міндеттерге сәйкес, ауқымды конституциялық реформа жасалды. Оның басты нәтижесі — саяси жүйенің “Күшті Президент — ықпалды Парламент — есеп беретін Үкімет” тұжырымдамасының негізінде жаңғыруы. Конституциялық реформада адам құқықтарын қорғауға, Заң мен тәртіп үстемдігін орнықтыруға баса мән берілді. Ата заңға әлемдік тәжірибеде бұрын-соңды болмаған, инновациялық сипаттағы бірқатар жаңа ереже енгізілді”, - деді Тоқаев.

Сонымен қатар Президент Қазақстанның конституциялық реформасына Венеция комиссиясы мен халықаралық сарапшылардың жоғары баға бергенін атап өтті. Ол ел азаматтарын Ата заңды құрметтеуге, ережелерін сақтауға шақырды.

“Әділетті, Таза, Қуатты әрі Қауіпсіз Қазақстан құрамыз десек, азаматтарымыз Ата заңды құрметтеп, оның барлық ережесін мүлтіксіз сақтауы керек. Қазақстан Республикасының стратегиялық мақсаттарына ұлтымызды жұмылдыратын Конституциямыздың аясында барша азаматымыздың Отанымызды өркендету үшін жасампаздықпен еңбек етуіне барлық жағдай жасалған. Еліміздің барша азаматына зор денсаулық, бақ-береке тілеймін”, - деді Мемлекет басшысы.