قازاقستان پرەزيدەنتى قاسىم-جومارت توقاەۆ بارشا قازاقستاندىقتاردى كونستيتۋتسييا كۇنىمەن قۇتتىقتادى. مەملەكەت باسشىسىنىڭ قۇتتىقتاۋ حاتى اقوردانىڭ رەسمي سايتىندا جارييالاندى, دەپ حابارلايدى Shalqar.kz.

پرەزيدەنت وز سوزىندە وسىدان 30 جىل بۇرىن وتكەن رەفەرەندۋمدا حالقىمىز تاريحي تاڭداۋ جاساپ, اتا زاڭدى قابىلداعانىن اتاپ وتتى. توقاەۆتىڭ ايتۋىنشا, كونستيتۋتسييا تاۋەلسىزدىگىمىزدىڭ تىرەگى ارى مەملەكەتتىلىگىمىزدىڭ مىزعىماس ىرگەتاسى بولىپ تابىلادى.

“قۇرمەتتى وتانداستار! بارشاڭىزدى كونستيتۋتسييا كۇنىمەن قۇتتىقتايمىن! وسىدان 30 جىل بۇرىن وتكەن رەفەرەندۋمدا حالقىمىز اتا زاڭىن قابىلداپ, تاريحي تاڭداۋىن جاسادى. كونستيتۋتسييامىز قازاقستان رەسپۋبليكاسى تاۋەلسىزدىگىنىڭ, قازاق مەملەكەتتىلىگىنىڭ بەرىك تۇعىرىنا اينالدى. وندا ۇلتىمىزدىڭ بۇگىنىن جانە بولاشاعىن ايقىندايتىن مىزعىماس قۇندىلىقتار مەن قاعيداتتار ناقتى كورىنىس تاپتى. اتا زاڭ قازاقستاننىڭ بارلىق ازاماتىنىڭ مۇددەسىن ۇلتىنا, دىنىنە قاراماستان بىردەي قورعايتىن الەۋمەتتىك مەملەكەت رەتىندەگى قۇقىقتىق ىرگەتاسىن قالىپتاستىردى.

كونستيتۋتسييا قوعامدىق كەلىسىم مەن ىشكى تۇراقتىلىقتىڭ باستى كەپىلى سانالادى. سان تۇرلى سالاداعى جەتىستىكتەرگە وسى نەگىزگى زاڭىمىزعا سۇيەنە وتىرىپ قول جەتكىزدىك. ۇش جىل بۇرىن ەل دامۋىنىڭ جاڭا تاريحي كەزەڭىندەگى مىندەتتەرگە سايكەس, اۋقىمدى كونستيتۋتسييالىق رەفورما جاسالدى. ونىڭ باستى ناتيجەسى — ساياسي جۇيەنىڭ “كۇشتى پرەزيدەنت — ىقپالدى پارلامەنت — ەسەپ بەرەتىن ۇكىمەت” تۇجىرىمداماسىنىڭ نەگىزىندە جاڭعىرۋى. كونستيتۋتسييالىق رەفورمادا ادام قۇقىقتارىن قورعاۋعا, زاڭ مەن تارتىپ ۇستەمدىگىن ورنىقتىرۋعا باسا مان بەرىلدى. اتا زاڭعا الەمدىك تاجىريبەدە بۇرىن-سوڭدى بولماعان, يننوۆاتسييالىق سيپاتتاعى بىرقاتار جاڭا ەرەجە ەنگىزىلدى”, - دەدى توقاەۆ.

سونىمەن قاتار پرەزيدەنت قازاقستاننىڭ كونستيتۋتسييالىق رەفورماسىنا ۆەنەتسييا كوميسسيياسى مەن حالىقارالىق ساراپشىلاردىڭ جوعارى باعا بەرگەنىن اتاپ وتتى. ول ەل ازاماتتارىن اتا زاڭدى قۇرمەتتەۋگە, ەرەجەلەرىن ساقتاۋعا شاقىردى.

“ادىلەتتى, تازا, قۋاتتى ارى قاۋىپسىز قازاقستان قۇرامىز دەسەك, ازاماتتارىمىز اتا زاڭدى قۇرمەتتەپ, ونىڭ بارلىق ەرەجەسىن مۇلتىكسىز ساقتاۋى كەرەك. قازاقستان رەسپۋبليكاسىنىڭ ستراتەگييالىق ماقساتتارىنا ۇلتىمىزدى جۇمىلدىراتىن كونستيتۋتسييامىزدىڭ اياسىندا بارشا ازاماتىمىزدىڭ وتانىمىزدى وركەندەتۋ ۇشىن جاسامپازدىقپەن ەڭبەك ەتۋىنە بارلىق جاعداي جاسالعان. ەلىمىزدىڭ بارشا ازاماتىنا زور دەنساۋلىق, باق-بەرەكە تىلەيمىن”, - دەدى مەملەكەت باسشىسى.