Qazaqstan Prezidenti Qasım-Jomart Toqaev barşa qazaqstandıqtardı Konstituciya künimen qwttıqtadı. Memleket basşısınıñ qwttıqtau hatı Aqordanıñ resmi saytında jariyalandı, dep habarlaydı Shalqar.kz.

Prezident öz sözinde osıdan 30 jıl bwrın ötken referendumda halqımız tarihi tañdau jasap, Ata zañdı qabıldağanın atap ötti. Toqaevtıñ aytuınşa, Konstituciya täuelsizdigimizdiñ tiregi äri memlekettiligimizdiñ mızğımas irgetası bolıp tabıladı.

“Qwrmetti otandastar! Barşañızdı Konstituciya künimen qwttıqtaymın! Osıdan 30 jıl bwrın ötken referendumda halqımız Ata zañın qabıldap, tarihi tañdauın jasadı. Konstituciyamız Qazaqstan Respublikası täuelsizdiginiñ, qazaq memlekettiliginiñ berik twğırına aynaldı. Onda wltımızdıñ büginin jäne bolaşağın ayqındaytın mızğımas qwndılıqtar men qağidattar naqtı körinis taptı. Ata zañ Qazaqstannıñ barlıq azamatınıñ müddesin wltına, dinine qaramastan birdey qorğaytın äleumettik memleket retindegi qwqıqtıq irgetasın qalıptastırdı.

Konstituciya qoğamdıq kelisim men işki twraqtılıqtıñ bastı kepili sanaladı. San türli saladağı jetistikterge osı negizgi zañımızğa süyene otırıp qol jetkizdik. Üş jıl bwrın el damuınıñ jaña tarihi kezeñindegi mindetterge säykes, auqımdı konstituciyalıq reforma jasaldı. Onıñ bastı nätijesi — sayasi jüyeniñ “Küşti Prezident — ıqpaldı Parlament — esep beretin Ükimet” twjırımdamasınıñ negizinde jañğıruı. Konstituciyalıq reformada adam qwqıqtarın qorğauğa, Zañ men tärtip üstemdigin ornıqtıruğa basa män berildi. Ata zañğa älemdik täjiribede bwrın-soñdı bolmağan, innovaciyalıq sipattağı birqatar jaña ereje engizildi”, - dedi Toqaev.

Sonımen qatar Prezident Qazaqstannıñ konstituciyalıq reformasına Veneciya komissiyası men halıqaralıq sarapşılardıñ joğarı bağa bergenin atap ötti. Ol el azamattarın Ata zañdı qwrmetteuge, erejelerin saqtauğa şaqırdı.

“Ädiletti, Taza, Quattı äri Qauipsiz Qazaqstan qwramız desek, azamattarımız Ata zañdı qwrmettep, onıñ barlıq erejesin mültiksiz saqtauı kerek. Qazaqstan Respublikasınıñ strategiyalıq maqsattarına wltımızdı jwmıldıratın Konstituciyamızdıñ ayasında barşa azamatımızdıñ Otanımızdı örkendetu üşin jasampazdıqpen eñbek etuine barlıq jağday jasalğan. Elimizdiñ barşa azamatına zor densaulıq, baq-bereke tileymin”, - dedi Memleket basşısı.