Абай облысының Ақсуат ауданындағы Қарғыба өзенінде жаңа су қоймасы салынады. Құрылыс жұмыстары 2026 жылы басталмақ. Қазір нысанның жобалау-сметалық құжаттары дайындалып жатыр, деп хабарлайды Shalqar.kz.

Жобаның уақытылы әрі сапалы жүзеге асуы үшін «Қазсушар» РМК жергілікті филиалының мамандары, Ақсуат ауданы әкімдігінің қызметкерлері және мердігер ұйым өкілдерінен комиссия құрылып, құрылыс жүргізілетін аумақты тексерді.

“Тексеру барысында тараптар жобаны жан-жақты талқылап, өз ұсыныстарын ортаға салды. Аудан әкімдігімен бірлесіп ішкі каналдар да қаралды. Жергілікті атқарушы органдар олардың реконструкциясына қатысты жобалау-сметалық құжатты әзірлеумен айналысады. Жаңа су қоймасы мен магистральді каналдар аудандағы ирригациялық жүйелердің толыққанды әрі тиімді жұмысын қамтамасыз етеді, – деді Абай облысындағы «Қазсушар» РМК филиалының директоры Жарқынбек Байсабыров.”