قازاقستاندا جىلۋ اقىسىنا بالكوننىڭ شارشى مەترى دە قوسىلۋى مۇمكىن. الايدا بۇل بارلىق تۇرعىندارعا بىردەي قاتىستى ەمەس. ەگەر ۇيدە ەسەپتەۋىش قۇرال بولماسا جانە بالكون بولمەمەن قوسىلىپ كەتسە, ول پاتەردىڭ جالپى اۋماعىنا ەنگىزىلەدى, دەمەك, تاريف جوعارىلايدى, دەپ حابارلايدى Shalqar.kz.

مىسالى, پاتەردىڭ نەگىزگى اۋماعى 50 شارشى مەتر بولسا, ال بالكونى 5 شارشى مەتردى قۇرايدى دەلىك. ەگەر بالكوندى قوناق بولمەگە قوسساڭىز, پاتەردىڭ تەحنيكالىق قۇجاتى بويىنشا جالپى اۋماعى 55 شارشى مەترگە وزگەرەدى. بۇل جاعدايدا جىلۋ اقىسى دا قىمباتتايدى. ۇلتتىق ەكونوميكا مينيسترلىگىنىڭ تابيعي مونوپولييالاردى رەتتەۋ كوميتەتى تۇسىندىرگەندەي, بالكوندى نەگىزگى بولمەگە قوسقان جاعدايدا ول «پايدالى اۋماققا» ەنەدى, ال ەسەپتەۋىش قۇرال ورناتىلعان ۇيلەردە تەك ناقتى تۇتىنعان جىلۋ ۇشىن تولەم جاسالادى.

بۇل ەرەجە كوبىنە ەسكى ۇيلەرگە اسەر ەتەدى, سەبەبى جاڭا باسپانالاردا جىلۋ ەسەپتەگىشتەرى ورناتىلعان. ياعني, تۇرعىن بالكوندى قوسسا دا, قوسپاسا دا, جىلۋدى ناقتى قولدانعانىنا قاراي تولەيدى. دەگەنمەن, كوپشىلىك بۇل جاعدايدى ادىلەتسىز دەپ سانايدى. كەيبىر تۇرعىندار «بالكون ەشقاشان بولمە بولا المايدى» دەسە, ەندى بىرەۋلەر «ەگەر جىلىتىلسا, تولەۋ ادىلەتتى» دەپ پىكىر بىلدىرۋدە.

زاڭ بويىنشا بالكون قوسىلىپ نەمەسە بولمەدەن بولىنگەن جاعدايدا پاتەردىڭ كاداسترلىق قۇجاتى جاڭارتىلادى. دەگەنمەن, ۇيدى ساتقاندا ەسكى تەحنيكالىق پاسپورت جارامدى بولىپ قالا بەرەدى. ال يپوتەكا راسىمدەۋ كەزىندە بانكتەر مىندەتتى تۇردە جاڭارتىلعان قۇجاتتى تالاپ ەتەدى.