جاڭا وقۋ جىلىنان باستاپ ەلىمىزدىڭ مەكتەپتەرىندە بۇرىن-سوڭدى بولماعان جاڭالىق – ستوماتولوگييالىق كابينەتتەر اشىلا باستادى. بۇل باستاما بالالاردىڭ دەنساۋلىعىن قورعاۋعا, ولاردىڭ قاۋىپسىزدىگىن كۇشەيتۋگە جانە ۇيلەسىمدى دامۋىنا جاعداي جاساۋعا باعىتتالعان, دەپ حابارلايدى Shalqar.kz وقۋ-اعارتۋ مينيسترلىگىنە سىلتەمە جاساپ.

وقۋ-اعارتۋ مينيسترلىگىنىڭ مالىمەتىنشە, ستوماتولوگييالىق كابينەتتەردى ەنگىزۋ مەملەكەت باسشىسىنىڭ تاپسىرماسىمەن جۇزەگە اسىرىلۋدا. سونىمەن قاتار, مەكتەپتەردە جاڭا تاماقتانۋ ستاندارتى ەنگىزىلدى: ەندى اس مازىرىنىڭ ساپاسىن ۇيىمداستىرۋ مەن باقىلاۋ تىكەلەي دەنساۋلىق ساقتاۋ ۇيىمدارىنىڭ مىندەتىنە اينالدى.

بۇگىنگى تاڭدا ەل بويىنشا 150 مەكتەپتە الدىن الۋ ستوماتولوگييالىق كابينەتتەرى اشىلىپ ۇلگەردى. جىل سوڭىنا دەيىن تاعى 90 كابينەت ىسكە قوسىلماق. ال 2028 جىلعا قاراي مەكتەپتەردە 1000-عا جۋىق ستوماتولوگييالىق كابينەت جۇمىس ىستەيتىن بولادى.

بۇل جاڭاشىلدىق ەڭ الدىمەن وقۋشى سانى مىڭنان اساتىن ىرى مەكتەپتەردى قامتيدى. اسىرەسە, «كەلەشەك مەكتەپتەرى» ۇلتتىق جوباسى اياسىندا جاڭادان سالىنعان بىلىم بەرۋ ۇيىمدارىنا ەنگىزىلۋدە.

جاڭا كابينەتتەردە بالالارعا اۋىز قۋىسى اۋرۋلارىنىڭ الدىن الۋ شارالارى كورسەتىلىپ, ەرتە دياگنوستيكالاۋ جۇرگىزىلەدى. سونداي-اق, سانيتارلىق-اعارتۋشىلىق جۇمىستار دا جوسپارلى تۇردە وتەدى. دەنساۋلىق ساقتاۋ مينيسترى اقمارال النازاروۆانىڭ ايتۋىنشا, مەكتەپتەردەگى ستوماتولوگييالىق كابينەتتەر وقۋشىلارعا تەگىن پروفيلاكتيكالىق كومەك كورسەتەدى.