Jaña oqu jılınan bastap elimizdiñ mektepterinde bwrın-soñdı bolmağan jañalıq – stomatologiyalıq kabinetter aşıla bastadı. Bwl bastama balalardıñ densaulığın qorğauğa, olardıñ qauipsizdigin küşeytuge jäne üylesimdi damuına jağday jasauğa bağıttalğan, dep habarlaydı Shalqar.kz Oqu-ağartu ministrligine silteme jasap.

Oqu-ağartu ministrliginiñ mälimetinşe, stomatologiyalıq kabinetterdi engizu Memleket basşısınıñ tapsırmasımen jüzege asırıluda. Sonımen qatar, mektepterde jaña tamaqtanu standartı engizildi: endi as mäziriniñ sapasın wyımdastıru men baqılau tikeley densaulıq saqtau wyımdarınıñ mindetine aynaldı.

Bügingi tañda el boyınşa 150 mektepte aldın alu stomatologiyalıq kabinetteri aşılıp ülgerdi. Jıl soñına deyin tağı 90 kabinet iske qosılmaq. Al 2028 jılğa qaray mektepterde 1000-ğa juıq stomatologiyalıq kabinet jwmıs isteytin boladı.

Bwl jañaşıldıq eñ aldımen oquşı sanı mıñnan asatın iri mektepterdi qamtidı. Äsirese, «Keleşek mektepteri» wlttıq jobası ayasında jañadan salınğan bilim beru wyımdarına engizilude.

Jaña kabinetterde balalarğa auız quısı aurularınıñ aldın alu şaraları körsetilip, erte diagnostikalau jürgiziledi. Sonday-aq, sanitarlıq-ağartuşılıq jwmıstar da josparlı türde ötedi. Densaulıq saqtau ministri Aqmaral Älnazarovanıñ aytuınşa, mektepterdegi stomatologiyalıq kabinetter oquşılarğa tegin profilaktikalıq kömek körsetedi.