15 قىركۇيەكتەن باستاپ enpf-otbasy.kz پلاتفورماسىندا زەينەتاقى جيناعىن تىس ەمدەۋگە پايدالانۋ بويىنشا وتىنىم قابىلداۋ ۋاقىتشا توقتاتىلادى. بىراق بۇل شەكتەۋ ۇزاققا سوزىلمايدى: وتىنىمدەر 2026 جىلدىڭ 15 ساۋىرىنەن كەيىن قايتادان قابىلدانا باستايدى, دەپ حابارلايدى Shalqar.kz.

وتباسى بانكتىڭ مالىمەتىنشە, مۇنداي شەشىمنىڭ سەبەبى – سوڭعى جىلدارى تىس ەمدەۋگە بولىنگەن زەينەتاقى قاراجاتىن ماقساتسىز پايدالانۋ مەن جالعان قۇجاتتاردى پايدالانۋ دەرەكتەرىنىڭ كوبەيۋى. وسىعان بايلانىستى دەنساۋلىق ساقتاۋ مينيسترلىگى بىرجولعى زەينەتاقى تولەمدەرىن ەمدەۋگە قولدانۋ ەرەجەلەرىنە وزگەرىستەر ەنگىزگەن ەدى. دەگەنمەن, ەنگىزىلگەن تۇزەتۋلەر ستوماتولوگييالىق قىزمەتكە قاتىستى كۇماندى سحەمالاردى تولىق توقتاتپاعان.

سول سەبەپتى ۇكىمەت دەنساۋلىق ساقتاۋ مينيسترلىگى, ەڭبەك جانە حالىقتى الەۋمەتتىك قورعاۋ مينيسترلىگى, قارجى مينيسترلىگى جانە قارجى مونيتورينگى اگەنتتىگىنىڭ قاتىسۋىمەن جيىن وتكىزىپ, وتىنىم قابىلداۋدى ۋاقىتشا توقتاتۋ تۋرالى شەشىم قابىلدادى. وسى ارالىقتا الاياقتىق ارەكەتتەردىڭ الدىن الۋ ۇشىن جاڭا جۇيە ازىرلەنەدى.

ستاتيستيكاعا سۇيەنسەك, 2021 جىلدان 2025 جىلدىڭ تامىزىنا دەيىن enpf-otbasy.kz پلاتفورماسى ارقىلى تەك «ستوماتولوگييالىق قىزمەتتەر» باعىتى بويىنشا 795 مىڭنان استام ترانزاكتسييا جاسالىپ, جالپى سوماسى 757 ملرد تەڭگە بولعان. ونىڭ ىشىندە 222,6 ملرد تەڭگە تەك 20 جەتەكشى كلينيكاعا تۇسكەن. بۇل كلينيكالاردىڭ جارتىسى اتىراۋدا ورنالاسقان, قالعانى الماتى مەن استانادا. تەك اتىراۋداعى بىر كلينيكاعا عانا ازاماتتار 22,9 ملرد تەڭگە اۋدارعانى بەلگىلى بولدى.

كۇدىكتى ترانزاكتسييالارعا قاتىستى ماتەريالدار قۇقىق قورعاۋ ورگاندارىنا جولداندى. قارجى مونيتورينگى اگەنتتىگى قازىردىڭ وزىندە بىرقاتار ستوماتولوگييالىق كلينيكالاردى تەكسەرۋدى باستاعان. بۇعان دەيىن زاڭسىز جولمەن 200 ملرد تەڭگە كولەمىندە زەينەتاقى قاراجاتىنىڭ جالعان ستوماتولوگييالىق قىزمەت كورسەتۋ ارقىلى شىعارىلعانى دا انىقتالعان.